أحلام يعرب (ليبية_منقولة)

الحلقة 77

#أحلام_يعرُب ((بين الحب والحرب))
#الحلقة_77 ((الفصل الأربعون نبض من طيات الماضي 2))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«يا الله يا ملجأ كل خائف ويا كاشف كل كربة أسألك بأن تقذف رجاءك في قلبي حتى لا يكون لي هم ولا شغلُ غيرك وأسألك أن تجعل لي من أمري فرجًا ومخرجًا إنك على كل شيء قدير»
.
.
.
«لا تحزن إذا ضاقت بك الحياة، فربما اشتاق الله لسماع صوتك، وأنت تدعوه»
.
.
خطوه للخلف
قبل ما نبدأ في احداث يوم الخميس
كانت في مكالمة بين احلام ويعرب يوم الاربعاء في الليل⬇️

بعد طول تفكير ومحاولة منها للمساعدة حتى هي في علاج بوها ما كانش قدامها الا حل واحد

عشان هكي اتصلت برجلها واللي كان مقمعز في الصالة
يلعب مع اوبا... كان مطلعه من القفص امتاعه ويحاول يخليه
يتعود عليه ويدرب فيه انه يطير من القفص ويجي لعنده

لما رن تليفونه ناض رجع الطير للقفص امتاعه ومشى لقط تليفونه ورد عليها  :  الو

احلام  :  الو... شن اخبارك

تنهد وقمعز  :   تمام بخير الحمد لله... شنو امديره... حالك باهي توا

رفعت شعرها للخلف  :  لا الحمد لله بخير

بلل شفافه  :  باهي ما شاء الله..... ان شاء الله ديمه بخير

احلام  :  اجمعين يارب

سكت يسمع فيها... وهي جمعت شجاعتها وبدات تحكي بشوية توتر  :  يعرب انت عارف وضعي وعارف وضع بوي وعارف ان نحنا توا محتاجين كل قرش وانا بصراحة مانبيش نقعد واقفه ونتفرج عليهم من غير ما ندير شيء والناس كلها تساعد الا أنا... حتى أنا نبي نساعد باي شيء

يعرب  :  تمام ما عندكش مشكلة.. قوليلي اللي تبيها مني وانا حاضر

تكلمت طول  :  لا لا مش هكي... مشكور انت ما قصرتش بكل بس انا قصدي نبي نقدم مساعدة مني انا

عقد حواجبه  :  بتساعديه كيف ما فهمتش عليك

بلعت ريقها تكلمت بتوتر  :  انا قصدي.. يعني انا ما عنديش الا ذهبي.. ااا... الطاقم والخربش متاعي... بصراحة ما فيش شيء يغلي على بوي ولو ما وقفتش معاه في الموقف هذا امتى نبي نوقف معه

ضيق عيونه  :  قصدك تبي تبيعيه؟!!

هزت راسها بتوتر  :  اها.... ان شاء الله

مرر يده بشعر للخلف  :  احلام علاش تبيعي فيه ساد بعتي العقد الكبير من قبل وتوا تبي تبيعي باقي الدهب... قصدي خلي حاجتك عندك... وأني مستعد اي شيء انت محتاجاته او تبيه انا نعطيهولك من غير ماتبيعي اي شي

احلام  :  يعرب مش هكي بالله عليك افهمني... أنا نبي نعطي شيء من عندي نبي مساعدة بوي تكون من حاجة ليا أنا... انت عمرك ما قصرت وبارك الله فيك... بس المره هذه أنا اللي نبي نعطيه ونوقف معاه...بالله عليك وعشان خاطري يا ريت تفهمني وتخليني براحتي اندير اللي نبيه... الله يخليك