أحلام يعرب (ليبية_منقولة)

الحلقة 33

#أحلام_يعرُب ((بين الحب والحرب))
#الحلقة_33((الفصل التاسع عشر كشف المستور))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم أنت الغني ونحن الفقراء، اسقنا الغيث ولا تجعلنا من القانطين، اللهم أغثنا غيث الإيمان في القلوب ولا تمنع عنا رحمتك يا رب العالمين»
.
.
.
18  /1 /2015  يوم الاحد... فلاش باك على فاتحة جمال  ⬇️
.
.
نزلت السلة بجنب باقي السلال.. وابتسمت  :  هكي تمام والاه.. تقريبا مش ناقص شي تاني

امجاد  :  لا تمام هكي... ماشالله قريب كسوة عرس هادي مش تلبيسة خطوبة

فطيمة  :  الحاجة الباهية والمقومة اكويسة...مانحبش نرفع معايا حاجة خايسة..وبعدين هذا واجب وقدر للعروسة.. باش تعرف من الاول أن العيلة تحب الحاجة لقنينة والباهية

عروبة نفخت وقمعزت  :  تعبت واني نجري من محل لمحل باش غلفتهم بطريقة حلوة وجوا زي مانبي

هناء  :  سلم دياتك.. لكن التغليف ايجنن ماشالله

عروبة مبتسمة  :  سلمك يارب

أمجاد شافت لامها :  زعما يعرب بيمشي يحضر الفاتحة مع أخواته يأم

رفعت اكتافها  :  والله مانعلم.. كلمته كم مرة.. لكن يعرب ماتعرفيش كيف يفكر وشني في راسه بالضبط... ربي يهديه ويسامح خوه ويمشي معاه

عروبة  :  لو يعرب خوي اللي نزبطه صاح... بيمشي معاه ومستحيل ايخليه بروحه في يوم زي هادا مهما كان

امجاد  :  يعرب عقله كبير وقلبه نظيف... وبرغم صغر سنه لكن قايم الحوش والعيلة فوق راسه وكأنه بونا ومش خونا

هناء  :  اي والله.. ربي يعطيه صحيحته ويحفظه... وهوا بكل مشاغله وهمومه ولكن مداير باله مننا كلنا ويفكر فينا .. وحتى لما جي جمال وقالي على مشية طرابلس عرفت طول يعرب هوا اللي مقايله عليها

عروبة  :  من صغره وهوا قريب من بوي الله يرحمه ويحاول يكون زيه وحتى بوي كان شايف نفسه في يعرب ويعرفه بيكون يوم  من لايام مكانه وخاصةً بعد وفاة محمد

تنهدت  فطيمة بحزن  :  الله يرحم بوكم ويرحم محمد ويحفظكم ليا ومانفقد حد فيكم

أمجاد تنهدت وقفت  :  ايييه يالله عاد خلينا انجهزوا كل شي معادش في وقت العصر قريب ياذن وبيقروا الفاتحة
.
.
.
جمال وسيف كانوا مقمعزين جنب بعض وفي وسطهم عمهم سعد واثنين اخرى من اعمامهم  واصحاب جمال في مربوعة انسباتهم لاجدد.. والمربوعة كانت مليانة رجالة وشباب من الجيران والعيلة

دق الباب وفز واحد من الشباب وطلع يفتح... وبعد سلام حار عند الباب خش الشاب وفي جرته يعرب وصدام لابسين عربي و وراهم الشيخ اللي بيقرأ الفاتحة

رفع اعيونه في خوه وابتسم... ويشوفله وهوا يسلم على الرجالة وبعدين وصل فيه.. وقف جمال ومد يده ويعرب سلم عليه بالخد وباركله