أحلام يعرب (ليبية_منقولة)

الحلقة 98

#أحلام_يعرُب ((بين الحب والحرب))
#الحلقة_98(( الفصل الثامن والأربعون_رسائل حب))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«الحمد لله رب العالمين، الذي علا فقهر، ومَلَكَ فقدر، وعفا فغفر، وعلِمَ وستر، وهزَمَ ونصر، وخلق ونشر، الحمد لله عدد ما خلق، الحمد لله ملء ما خلق، الحمد لله عدد ما في السموات وما في الأرض، الحمد لله عدد ما أحصى كتابه، الحمد لله على ما أحصى كتابه، الحمد لله عدد كل شيء، الحمد لله على كل شيء»
.
.
.
بعد مواجهات بالرصاص بين قوتين مافيش اي تكأفؤ بينهم لا في السلاح ولا العدد... طاح عمران وجماعته بين ايدين قوات الردع واضطر يسلم

قبضوا عليهم... وفي مجموعة دخلت مداهمة لداخل الحوش... كانوا نجمة والبنات مخلوعات ويعيطوا... ونجمة بالذات كانت في حالة رعب كبيرة وجسمها يخض من الفجعة

وبرغم كل الشر اللي في داخلها... وحتى وصلت للقتل... بس موضوع انها ينقبض عليها في مكان مشبوه زي هذا ماعمرها فكرت فيه ولا خطر عليها

ولو تبوا الحق... نجمة بكل سيئاتها... بس مافيش راجل عمره مسها ألا يعرب وبالحلال... وعمران لولا حاجتها وادمأنها والغضب اللي عمى اعيونها... ماعمرها فكرت في يوم تطلع معاه ولاتفرط في جسمها بالحرام لاي راجل

وهنا يبان تأثير الحاجات السيئة اللي تبدأ بشي بسيط وكل ماتستمر في طريق الغلط الامر يخرج عن سيطرتك وتلقى روحك في دوامة كبيرة صعب تخرج منها بسلام

الغلط يولد غلط اكبر منه... الغضب يعمي البصيرة... الحقد يغلف القلب بالسواد...ويجرك لطريق الهلاك

الانسان بطبعه خطاء... كلنا بشر... وكلنا نغلطوا...مافيش انسان معصوم من الخطأ...بس خلي الغلط يكون عبرة ليك... كف يوعيك لنفسك وللمستقبلك

ماتصلحش غلطك بغلط اكبر منه...ماتخليش الشيطان يحسك بالضعف ويخليك تفقد أملك في الله...ربي رحمته وسعت كل شي

ماتقولش أنا انسان مش كويس وادير عذر باش تستمر في طريق الغلط متاعك...انفض عنك الشيطان..تعوذ منه...و ماتقنطش من رحمة ربك...لانه غفور رحيم...يسامح ويغفر  .. ويعطي فرصة واثنين وثلاثة

۞ قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ۞

خلي إيمانك بربك كبير... ادعي لنفسك بالهداية... وحاول تتقرب منه حتى لو بالغصب عليك... والاجر حيكون مضاعف صدقني... لانك قاعد تحارب في نفسك الأمارة بالسوء.

أنت اللي أبدأ بنفسك... أنت اللي اصنع التغيير في حياتك وتصرفاتك... لان مافيش حد بيردك عن طريق الشر و بيغيرك الا نفسك
۞إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ۞