أحلام يعرب (ليبية_منقولة)

الحلقة 49

#أحلام_يعرُب ((بين الحب والحرب))
#الحلقة_49((الفصل الثالث والعشرون حوائي 3))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم بدل حزني فرحاً وهمومي سعادة وضيقي فرج و أرزقني يوما أفضل من أمسي فليس لي سواك يارب»
.
.
.
ساوت وشاحها... ومشت طلعت وراء خيري... طلعت من المدخل.. وقابلتها مراة واقفة في السور ومعاها طفلين.. واحد في غمرها.. والثاني شاد في عباتها

طلع خيري وشاف للمراة  :  اهي شوفيها... وطلع لشارع

قدمت منها والمراة اول ماشافت أحلام ابتسمت بتوتر وقربت اتسلم عليها

سلمت عليها بالخد.. وبعدين وخرت وشافت لوجهها  :  تفضلي خشي

المراة  :  بالله ياخيتي هذا حوش عيت الحواتي

أحلام يدها مازلت في يد المراة وحست بيها مصقعة واجد..شدتها   :  باذن الله.. تفضلي هيا

المراة بتوتر وحشمة شدت يد احلام للخلف :  ارجي بس.. يعرب قاعد والا لا

أحلام  :  لا مش قاعد والله

المراة بتردد  :  والله مش عارفة شن بنقولك.. بس قالولي انه مريض واجد.. زعما صاح والا غير يكذبوا عليا

زمت فمها بحزن  :  لا صاح فعلاً يعرب مصاب وقاعد يتعالج

المراة بخوف  :  مصاب كيف.. قصدك داير حادث والا شنو بالضبط

عقدت حواجبها  :  ماعليش يعني.. بس انا والله ماعرفتك كان انتي قربيتهم والا تعرفيهم اسمحيلي

المراة بأحراج  :  لا والله بسلامتهم اول مرة انخشلهم حوش ومانعرف حد فيهم غير يعرب الله يحفظه لامينته ولاهله

أحلام اتشوف لصغار وخدودهم حمر من الصقع  :  باهي تعالي خشي صقع على العيال

دمعوا اعيونها وضمت العيل في غمرها زين  :  الله غالب ليا فوق من الساعة اندور على الحوش ونسأل ماقبل عرفت الوصف اكويس.. غير في ولد حلال في الشارع اللي قبلكم جاء يمشي قدامي لعند هنا

ابتسمت  :  وصلتي ومرحبا بيك.. وبالله عليك هيا تفضلي صقع على الصغار

بلعت ريقها وابتسمت بتوتر  :  الله يرحم والديك.. واسمحيلي كان جيت في وقت مش وقتي

احلام تمشي قدامها  :  ماتقوليش هكي مرحبتين بيك

خشت احلام والمراة وراها... وعند الباب الوسطي بعد المدخل تلاقت مع عروبة  :  منو جي

تلفتت وراها  :  مانعرفش والله.. لكن قالت انها تعرف يعرب وجاية تسأل عليه

عروبة عقدت حواجبها وتشوفلها زين  :  اهلين بيك.. تفضلي ياوخيتي

حولت المراة من رجلها وخشت والطفل شاد في عباتها وخش وراها  :  الله يزيد فضلك يارب

قدمت منها عروبة وسلمت عليها.. و وسعت الباب وخشت المراة وعروبة شافت لاحلام وهزت راسها بمعني مني هذه