#أحلام_يعرُب ((بين الحب والحرب))
#الحلقة_94((الفصل السابع والأربعون_أنت لي 3))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهي يا ذا النور الذي لا يطفأ سرمدا، أسألك أن تكفيني شر كل ذي شر، و أسألك فرجاً قريباً وصبراً جميلاً، وأسألك العافية من كل بلية اللهم بك أدفع ما أنا فيه، وأعوذ بك من شره يا أرحم الراحمين، ولا حول ولا قوة الا بالله العلي العظيم»
.
.
.
شاد يدها بقوة في يده
وهي صوابعها متشابكة مع صوابعه... والاثنين في داخلهم خوف وهواجس
هوا كان يسوق ويشوف للطريق... ولكن عقله يفكر في شي ثاني
كان سارح ويكلم في روحه ⬇️
«الوضع بينا بدأ يرجع زي قبل ... وأحلام قاعدة تسامح فيا بالشويا وحاس بيها بدت ترخي في الحبل.... يبقى مافيش داعي تعرف بشي توا... اصلاً مافيش شي باش نحكي فيه معاها... الموضوع قديم ومن الماضي...أنتهى من زمان ومشي في حاله»
شافلها وتنهد «علاش نفتح في مواضيع قديمة معاها... غير بنخرب الجو بينا وبنرجعوا للنقطة الصفر... ومرات أحلام تزعل وتفكر أن في شي صاير بينا توا»
هز راسه ويحرك في صبعه على فمه « لا لا رد بالك اتقول شي وتخربها... الماضي فات ومشي في حاله مافيش داعي تفتح دفاتر قديم مابتغير شي ولكن بتجيب وجع راس ليكم وخلاص... فوت الموضوع وخليك ساكت خير... كلها اربع.. خمس ايام وتاخد مرتك وتروح بيها... مافيش داعي تحكيلها اي شي عن ماضيك اللي كان قبلها»
ولما كان يكلم في روحه واتخذ قرار بالتزام الصمت.. ومافيش داعي يحكي في الماضي... كانت زوجته... تلعب على طرف وشاحها بتوتر وحتى هي سارحة وتفكر في الرسالة اللي وصلت من شوية على تليفونها
«زعما من دز الرسالة... اكيد اللي دزها حد يبي يخرب بيني وبين يعرب... لكن شن مصلحته وكيف عرف رقمي... زعما نجمة... اها اكيد نجمة... مافيش حد عنده مصلحة يخرب بينا الا هي وأكيد تكذب عليا»
حركت اعيونها وشافت لراجلها « لكن من الماضي اللي كان في حياة يعرب... وكيف قريب منا وعلى بعد خطوة بس»
تنهدت وشافت لقدام « شن تقصد لما قالت فكري في السبب اللي خلاء يعرب يطلعني من حوش أمجاد... حوش امجاد مافيش حد الا أخت صلاح... زعما تقصد الدكتورة زهرة؟!!»
بلعت ريقها وغمضت اعيونها «إن شاء الله مش هي ياربي... البنت اكويسة وحبيتها... لا لا لا مستحيل اتكون هي... اصلاً مالاحظتش اي شي صار بينهم... وبعدين زهرة كانت اكويسة معايا وماحسيتش أنها تكرهني او تتحسس مني لاي سبب... بالعكس كانت تعامل فيا بكل احترام وقدر.. وبشكل طبيعي»
رجعت شافت لراجلها كان سارح ويشوف لطريق « بس مرات كان يعرفها من قبل وبعدين تفارقوا وماصارش نصيب بينهم... لا لا أحلام ماتفكريش هكي ردي بالك... ماتخليش الشيطان يخش بينكم... وبعدين حتى لو كان في شي بينه وبين زهرة... اكيد شي قديم وأنتهى مافيش داعي تفتحي معاه الموضوع... الماضي اللي قبل نتزوجه ماليش علاقة بيه بكل... المهم توا وأنا معاه ومادام مافيش اي تصرف غلط منه ويحترم فيا...وحتى لو صح طلعنا من حوش اخته عشان زهرة...فاهذا يعني أن يعرب مايبيش اي اتصال بيها وقاعد ايدير في كل شي عشان يبعد عنها.... يبقى اي كلام ثاني مجرد فتنة وتخريب بيوت.. وأنا مستحيل نسمح لاي حد يخرب بينا من جديد.. ساد اللي شفته من قبل وساد المشاكل اللي باعدت بيني وبينه وخربت حياتنا وماشفناش يوم واحد راحة... ماتخليش حد يدخل بينكم أحلام وحافظي على زوجك وحوشك وصكري اي باب للفتنة طول»
YOU ARE READING
أحلام يعرب (ليبية_منقولة)
Action﮼أحلام،يعرب((بين الحب وااحرب)) للكاتبة: ﮼أم،ناصر🤎. 🔥قيد الكتابة🔥.
