أحلام يعرب (ليبية_منقولة)

الحلقة 91

#أحلام_يعرُب ((بين الحب والحرب))
#الحلقة_91((الفصل السادس والأربعون_أثراً بعد عين 3))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللّهم ألف بين قلوبنا، وأصلح ذات بيننا، وإهدنا سبل السلام، ونجنا من الظلمات إلى النور، وجنبنا الفواحش ما ظهر منها وما بطن، وبارك لنا في أسماعنا، وأبصارنا، وقلوبنا، وأزواجنا، وذرياتنا، وتب علينا إنك أنت التواب الرحيم، واجعلنا شاكرين لنعمتك مثنين بها عليك قابلين لها وأتممها علينا»
.
.
.
آلُبْعدِ أحٍيَآنْآً لُآ يَؤلُم...
ۆلُگنْ آلُمؤلُم
أنْ يَبْتٌعدِ عنْگ شُخـصٍ أفَصٍحٍتٌ لُہ يَۆمآً
بْأنْ آلُبْعدِ هۆ آلُشُيَء آلُۆحٍيَدِ آلُڏيَ يَگسرگ
.
.
الاحد 7 / 6 / 2015  الساعة عشرة الصبح

كانوا فطيمة وعويشة وعروبة وصدام في زيارة عند مسرة في المستشفى

بعد السلام الحار بينهم من بعد فراق طويل... كانت مسرة تتكلم مع عمتها وامها وبنت عمتها عن وضع ولدها

وصدام وكريم واقفين عند الباب ويهدرزوا مع بعض

تنهدت براحة  :  يعني الولد حاله باهي ومعادش عليه خوف

أبتسمت ويدها في شعر ولدها  :  اي ياعمتي الحمدالله.. الدكتور اليوم مر عليه وقال كمل علاجه وتقدري تروحي بيه للحوش عادي

عويشة  :  الحمدالله ياربي... كنت قاعدة انفكر ومتغششة الحق... نحساب بيجي العرس وانتي معاه في المستشفى

حطت يدها على صدرها وتنهدت براحة  :  لا الحمدالله.. حتى اني كنت خايفة من اللقطة هادي.. وقلت بيفوت العرس واني هنايا

فطيمة  :  الحمدالله بسلامته.. وباهي اللي ربي سلمه ليك ونجاه... إن شاء الله ماتشبحي فيه سوء

مسرة  :  سلمك.. إن شاء الله يارب

عروبة  :  اي وقت بيخرجوه من اهني

مسرة شافت لتليفونها  :  مازال بكري توا... ممكن مع الساعة احداش هكي يعطوه ورقة الخروج

عروبة  :  إن شالله... معناها بتطلعي معانا والا

عويشة شافت لفطيمة :  اي... انكان مش مستعجلين نستنوا ونروح بيها بالمرة

فطيمة  :  لا ماعندنا مانديروا...نستنوا معاها لعند تطلع

عروبة  :  معناها خلي انقول لصدام باش مايستعجلناش

وتحركت طلعت على خوها و ولد خالها واقفين في الممر  :  صدام

تلفت عليها وقرب منها  :  نعم... نمشوا خلاص

عروبة  :  لا مازال اشوي... الولد عنده خروج وبنطلعوهم معانا بالمرة

ملامح وجهه تبدلت لراحة اكثر  :  حق؟.. يعني حاله باهي

ابتسمت  :  اي الحمدالله الولد كمل علاجه والدكتور قال بيطلعه... بس مازال مايقدرش يتحرك هلبا ويبي محافظة ومراقبة في الحوش