أحلام يعرب (ليبية_منقولة)

الحلقة 59

#أحلام_يعرُب ((بين الحب والحرب))
#الحلقة_59((الفصل التاسع والعشرون أرواح مرهقة))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم إني أدعوك دعاء من أتاك لرحمتك راجيًا ولطلب نصرتك يا الله يا ذا الجلال والإكرام من الظلم الذي وقع بي، اللهم إني أرجو رحمتك في رفع الظلم عني اللهم اجعل مظلمتي في ميزان حسانتي ثقيلاً واجعل الظلم في ميزان من ظلمني كجبل أُحُد»
.
.
.
ابتسم وخذا منها فنجان القهوة  :  صحيتي

ابتسمت بود  :  سلمك.. صحة

مشت ناحية الاطفال يلبعوا مع اوبا... وهوا مقمعز وسط خوته ويهدرزوا

رشف من قهوته وضيق اعيونه  :  شن قصة هالجمعة.. إن شالله خير

سيف رفع ايديه  :  أني كنت جايبلهم غدي.. مانعلمش بيكم

جمال تنهد  وشاف لخوه  :  جيت اهنايا باش بنقولك عن فسخ خطبتي ونبيك تمشي معايا نتفاهموا مع بوها

عقد صدام حواجبه  :  فسخت شني؟!!  بجديات

نفخ جمال ورجع لاخلف انسند على كرسيه  :  اي بجديات

صدام  :  إن شالله على سبة كلام راوية؟!

شافله جمال بارتبأك  :  منو قالك؟!

رفع سيف رجليه على الكرسي وسبق خوه لما جاوب :  اكيد خديجة من غيرها

صدام شاف لسيف وبعدين تلفت على جمال  :  راوية فتانة وتحب ادخل المواضيع في بعضها.. ماديرش موضوع من كلامها

حط يده على رقبته وتكلم بتوتر  :  القصة مش على سبة كلام مرتك وبس... المشاكل بينا من زمان غير كنت نساير فيها وصابر... لكن خلاص فديت ومعادش عندي خلوق لزيجة هادي من اصلها

سيف مبتسم  :  معادش تبي تتزوج والا كيف

رفع حاجبه متهكم  :  والله حق؟!!  نبي نتزوج امالا كيف... بس مش توا.. بناخد راحة من موضوع لنساوين الفترة هادي لعند نعرف راسي من رجليا قبل

صدام غمض اعيونه وتنهد بتعب  :  والله لو تسمع كلامي فوت عليك الزواج وخلطته بكل مايجيك منه كان وجع الرأس وخلاص

جمال  :  تي لا عاد كان فشل زواجك ماتجيش تعطينا نصائح توا.. خلينا انجربوا قبل مش كلنا زيك

سيف متهكم  :  والنبي اشبح من يتكلم عن الفلاحة.. على اساس انتا متكم امورك... وانتا خشيت في الحيط من اولها

جمال قلب اعيونه  :  باهي ضم فمك واسكت خير مانوضلك يافرخ  ... وبعدين انتا سنقل حزين معادش تحشر روحك في امور المرتبطين خليك في خدمتك وبس

رفع ايديه وابتسم  :  واقسم بالله اموري لوز الوز ومستريح وموضوع الزواج فايته بالرسمي ومخليهالكم بالوسع