أحلام يعرب (ليبية_منقولة)

الحلقة 23

#أحلام_يعرُب ((بين الحب والحرب))
#الحلقة_23((الفصل الثالث عشر حرب جديدة ) )
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم اكشف عني وعن كل المسلمين كل شدة وضيق وكرب، اللهم أسألك فرجًا قريبًا، وكف عني ما أطيق، وما لا أطيق، اللهم فرج عني وعن كل المسلمين كل هم وغم، وأخرجني والمسلمين من كل كرب وحزن»
.
.
.
هزت راسها وعقدت حواجبها  :  من وين تبي تشوفيه يااحلام.. أكيد يشبه لاحد تعرفيه بس

كانت اتكلم مع روحها وهيا تمشي وراء هناء.. ومشوا جيهة المطبخ

عروبة صورت مع عزالدين... وبعدين هوا طلع وهيا خشت للصالة

اليوم حنتها واهل عزو بيرموا عليها ويجيبوا الكسوة والذهب... لان اهل عزالدين معازيمهم واجد قرروا كل واحد ايدير عرسه في يوم بروحه

تقدروا اتقول زي زمان.. المهم اليوم كانت لابسه فستان حلو وتسريحة بسيطة.. ومكياج حلو

دخلت لصالة ومعاها المصورة لعند الكرسي... قمعزت والدجي صوته معبي الصالة والبنات يرقصوا عليه

رجعت لطاولة مع هناء.. قمعزت واعيونها على جازية مع راوية ونجمة وتهدرز مع فيطمة
.
.
ابتسمت مجاملة  :  باهي ربي يكمل عليها بالخير

فطيمة  :  يبارك فيك.. سلمك

التفتت على رواية  :  وأنتي مازلتي مادرتي اعيال لعند توا؟

وجهها لونه تغير وبلعت ريقها بتوتر  :  ااا اها.. ربي مازال ماراد

عقدت حواجبها  :  والعيب فيك والا فيه  ؟

شافت لنجمة بصدمة وجهها انحمر  :  مافيش عيب عند حد.. قصدي مازال ربي ماقسملي نحمل بس

نجمة تهمس وراها  :  شني المراة هادي... خيرها هكي؟

راوية  :  اششش.. اسكتي

جازية قربت منها  :  مشيتي لطبيبة عرب اتشوفك مرات ايكون حزامك مبروم

عقدت حواجبها  :  كيف يعني؟! 

جازية  :  يعني تبي تمريس (( تدليك)) لعند اترده مكانه عشان تقدري تحملي..  تلقيك وانتي شباب تشيلي في الفرش والثقيل ومانكش فاطنة لروحك وروحك مقلوبة

راوية شافت لنجمة مش فاهمة... والاخيرة هزت راسها وامتعضت منها

راوية  :  زمان امي خذتني لولية ايقول عنها طبيبة عرب اكويسة.. شافتني وهكي.. اعطتني عسل مخلط باعشاب وحاجات اخرى وقالتلي مافكيش شي باذن الله... لكن حتى بعد كملت العلاج متاعها ماصارش حمل ولا تغير شي

زمت فمها ولوحت بيدها  :  لا هذي عندك تلقيها ماتنفعش ولا تعرف حاجة... راه الصبايا موش نفس بعضهن... فيهن اللي شاطرة وتعرف كل حاجة وفيهن اللي ماتعرف بصيرة وتاخذ في فلوس وخلاص