أحلام يعرب (ليبية_منقولة)

الحلقة 72

#أحلام_يعرُب ((بين الحب والحرب))
#الحلقة_72((الفصل السابع والثلاثون لابد لليل أن ينجلي))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم لك الحمد في السراء والضراء.. ما أحزن الله عبدًا إلا ليسعده، وما ابتلي الله عبدًا إلا لأنه يحبه، فالحمد لله دائمًا وأبدًا.
الحمد لله الذي نظن به خيرًا، فيكرمنا بأفضل مما ظننا به الحمد لله في الجبر والكسر، في الضيق والاتساع، وفي الفرج والكدر»
.
.
.
دخل معاه للحوش بعد ماعرف عن نفسه وقاله نبيك في موضوع مهم

قمعزوا في المربوعة والشاب يبان على وجهه علامات الاستغراب والفضول أن يعرف من الضيف اللي جاءه وسبب الزيارة

والضيف اشبع فضوله لما بدأ يتكلم عن سبب زيارته  :  شوف ياخوي أنا لا نعرفك ولا أنت تعرفني ومتأكد أنك في عقلك تسأل هذا منو وشن يبي مني.. وعشان مانطولش عليك وانجيك من الاخير

ارتفع وطلع تليفونه من جيب سرواله  :  في مقطع فيديو نبيك اتشوفه وأكيد انتا شايفه وعارف قصته

الشاب  :  فيديو شنو

فتح تليفونه وحط على مقطع فيديو معين ومدله التليفون... خذا منه وقعد يتفرج عليه

عقد حواجبه في البداية مش فاهم ومش مستوعب القصة  :  هذا شنو... شن قصته المقطع هذا؟!

عبيدة  :  اصبر اشوي وكمل للاخر توا تعرف

رجع بعيونه لتليفون ولما شاف سيارته ونفسه في نهاية الفيديو رفع اعيونه من جديد في عبيدة  :  هذا أنا و سيارتي... لكن شن دخل الكلام المكتوب... ومن البنت هذه

عبيدة  :  البنت هذه أخت صاحبي من البيضاء... وأنت كنت تسلم فيها طلبية غادي مع المندوبة

رجع شاف لفيديو وبدت ملامح عدم الفهم والاستيعاب تبان على وجهه  :  تمام متذكر الطليبة هذه... لكن شن دخلني بالفيديو والكلام المكتوب عليه

عقد حواجبه  :  أنتا شايف الفيديو هذا من قبل

هز راسه بالنفي  :  لا والله... هذه اول مرة انشوفه

عبيدة  :  غريب مع انه الفيديو منتشر على الفيس من فترة

الشاب  :  ماعنديش على الفيس والدوة هذه.. أنا راجل نخدم ومانقعدش بكل ومش فاضي للفيس بكل

خذا نفس قبل مايجاوب وزفر  :  كنت متوقع انك شايفه...عموماً  القصة طويلة وغريبة.. ولكن أنا جاي باش نوضحلك الصورة ونبيك توقف مع الحق

ضيق اعيونه  :  كيف يعني... ماعليش ياشاب بس أنا لعند توا ماعرفتش انتا منو وليش جايني وتوري فيا الفيديو هذا

بلع ريقه وقرب منه  :  القصة ومافيها أن الطلبية اللي وصلتها للبيضاء وكاينة توصيلة عادية زيها زي غيرها.. في ناس وسخة استغلتها وقلبت الموضوع وتحاول تشوه سمعة مراة نظيفة وتطعن في شرفها