أحلام يعرب (ليبية_منقولة)

الحلقة 80

#أحلام_يعرُب ((بين الحب والحرب))
#الحلقة_80 ((الفصل الواحد والاربعون أمر واقع 3))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم يا من تقول للشيء كن فيكون.. ارزقني الصبر والسعة في الرزق، وباعد بيني وبين الحاسدين الحاقدين يا رب العالمين.. ولا تسلط علي عبادك بذنوبي فإنك على كل شيء قدير»
.
.
.
فرج  :  امالا عليش تبي تردي معاه للحوشك

احلام بخجل  :  لاني نعرفه... ونعرف طبعه... هوا هكي ديما

فرج  :  كيف هكي ديما... يعني تبي تردي معاه بدون ماتعرفي السبب اللي خلاه دار معاك هذا كله... وحتى اعتذر مع تعذر منك

أحلام  :  هوا طبعه هكي وااا

فرج مقاطعها   :  مع روحه... مع الناس لاخرين.. مع اصحابه مع هله... مش معاك.. مش مع مراته

طبست منحرجة ومعاش عرفت شن تحكي... جزء كبير من كلام بوها صح

فرج  :  أحلام نا قصرت في حقكم واجد... ظلمتكم واجد انتي وامك وخوك... جازية الله يعطيها دعوة انظر كيف خلتني لا نحق ولا نسمع الا فيها... خلتني تسلطت عليكم وقهرتكم واجد ومادرت فيكم خير... لكن يابنتي ان طرتي والا نزلتي نا بوك ومانيش غريب عليك ومريض مانيش بوعي... لكن انتي ليش ترضي راجل غريب يتصرف معاك هكي ويعاملك بالطريقة هذه

أحلام  :  يعرب مش غريب... هذا راجلي

فرج بحدة   :  راجلك كيف... لا يحكي معاك ولا يرقد معاك ولا يعامل فيك كازوجته... راجلك علي اي اساس... والا لانه يصرف عليك ويوكل فيك

هزت رأس ودموعها طاحوا  :  لا مش هكي... قصدي يعرب اكويس... يعني هوا بس.. مش عارفة كيف.. بس هوا

فرج  :  بس هو ايش... مش قادرة تعطيه عذر لانك مش عارفة اي شي ولا فاهمة اللي صار معاك... ولا حاتفهمي طول عمرك لو قعدتي معاه هكي... لانه ماكلف نفسه ايجي ويحكي معاك زي الناس... يشرحلك الوضع بالكامل ويعطيك سبب لتصرفاته معاك... جاي هنا يهزب ويعارك ويبي ياخذك معاه وخلاص... عناد فيا عناد فيك.. عناد هكي وخلاص المهم ياخذك... أنتي تبيه يتعود على هكي... يقصر معاك ويغلط  فيك ويقولك لو مش عاجبك عدي لحوش بوك... ولما تمشي منه حرجانة ايجيك هكي بكل بساطة ويردك للحوشه بدون مايكلف نفسه حتى اعتذار... ترضيها في نفسك أنتي

ضمت شفافها وهزت راسها مطبسة  :  لا

فرج  :  يعرب عليش تزوجك اصلاً من البداية

رفعت اعيونها في بوها بخوف

شاف لعيونها وتكلم  :  تزوجك عشان خالد خوك... عشان يريح ضميره

فتحت اعيونها بصدمة

فرج بحزن  :  ماتبحتيش فيا هكي... نا الكلام هذا عرفته من جازية... كانت تعرف سلفتك والا هي ضرتك وتحكي معاها وتجيبلي في اخبارك كلها ومشاكلك معاه