أحلام يعرب (ليبية_منقولة)

الحلقة 105

#أحلام_يعرُب ((بين الحب والحرب))
#الحلقة_105(( الفصل الواحد والخمسون-سَنَشُدُّ عَضُدَكَ بِأَخِيكَ»

((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم لك الحمد حمداً لا ينفد أوله ولا ينقطع آخره اللهم لك الحمد فأنت أهَلْ أن تحمد و تعبد و تشكر. اللهم لك الحمد في اليسر و العسر اللهم لك الحمد على نعمك التي لا يحصيها غيرك.
اللهم لك الحمد حمداً لا ينبغي إلا لك لا إله إلا أنت.. أنا المهموم الذي فرجت فلك الحمد. سبحانك اللهم وبحمدك لا إله إلا أنت أسألك إجابة الدعاء والشكر في الشدة والرخاء»
.
.
.
شافله بعدم أستيعاب وضيق اعيونه : شنو؟!!

يعرب : مش قتلك أني تواصلت مع اماليك بعد احداث بنغازي... وتعرفت على بوك وحتى خديت أمي زيارة ليهم... اي بعدين تقدمت لاختك وخطبتها وتزوجنا

شاف لملامح وجهه زين وكان متاكد انه ماعنداش في البصارة وخاصةً في حاجة زي هكي... بلع ريقه وهز راسه : فاجاتني بصراحة... ماكنتش متوقع حاجة زي هكي بكل... قصدي حتى اختي ديما اتقولي مش مفكرة في الزواج توا بكل لعند تتخرج وتكمل دراستها

سكت ثواني يفكر بعدين شاف ليعرب : بالله تحكي جديات أنتا

هز راسه : اي جديات خالد

حرك راسه وملامح وجهه واضح مازال يستوعب في الخبر... رجع بعيونه ليعرب : قتلي شن ليكم متزوجين

يعرب حس بتوتر يعرف شن يبي يجيه من تسأل بعده ... بلل شفافه ورد : لينا قريب العشر شهور

طبس وعد على صوابعه وبعدين رفع راسه ليه : على هكي متزوجين في شهر تسعة اللي فات

هز راسه موافق : اي.. في نص شهر تسعة

عقد حواجبه وتسأل بضيق : يعني بعد شهرين بس على احداث بنغازي... معقولة اختي وباتي وهلي دارو فرح وأنا مفقود ومازال مش معروف وضعي شنو...وأحلام تزوجت عادي ومادورتنيش بكل ولا همها امري حي ولا ميت

يعرب : خالد ماتظلمش اختك... أحلام تعذبت هلبا على خاطرك... وللتوا قاعدة غير تساير في الحياة وخلاص الا قلبها نار عليك وتدعي لليل نهار انها تسمع حتى صوتك بس وتطمن عليك

شاف لعيونه بحيرة... وبعدين تلفت وهو مش مقتنع... طول فترة غيابه وكل همه وتفكيره في اخته وبس واكثر شي كان يخمم فيه هو مصيرها وخوفه من حزنها عليه... يروح بعد حوالي سنة يلقاها متزوجة بعد غيابه طول وعايشة حياتها عادي... في شي مش مفهوم وغريب؟!!

حط يده على كتفه : خالد أني فاهم عليك...وعارف انك منصدم ومش قادر تستوعب اللي صار واني مستعد نشرحلك اي شي مش فاهمه ونوضحه ليك وبكل صراحة

هز راسه بحيرة : أنا بس مش متوقع بصراحة... قصدي أنتا ماتعرفش علاقتي باختي كيف كانت... أنا واحلام ماعندناش الا بعضنا بعد وفاة أمي الله يرحمها...وكنت كل شي في حياة احلام... كيف هكي تغير كل شي في للحظة واحلام نستني في شهرين وبس ولا كاني مفقود ورايح منهم في الحرب والله اعلم حي والا ميت