أحلام يعرب (ليبية_منقولة)

الحلقة 21

#أحلام_يعرُب ((بين الحب والحرب))
#الحلقة_21 ((الفصل الثاني عشر إنتهاء ازمة))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم اني اسألك بأني اشهد انك انت الله لا اله الا انت الأحد الصمد الذي لم يلد ولم يولد ولم يكن له كفوا أحد اشفني شفاء لا يغادر سقما وعافني وقوني يارب»
.
.
.
14 / 10 / 2014 يوم الثلاثاء

بعد يوم ولليلة متعبة على يعرب وأحلام في اول جلسة علاج مع الشيخ... الثلاثاء الصبح كان يعرب واقف مع المهدي عند بوابة الاستراحة

مسح لحيته وهز راسه بأسف  :  لا حول ولا قوة الا بالله العلي العظيم... صار الموضوع سحر... ياويل الناس اللي ماتخاف ربها ولا تعد في يوم لحساب

يعرب  :  حسبي الله ونعم الوكيل فيهم... ربي يتولاهم إن شالله

المهدي  :  إن شالله... ولكن من عنده مصلحة يسحرها  ؟

مرر يده بشعره ونفخ  :  مانعرفش.. واساساً الشيخ قالي ممكن حتى متخطية بروحها يعني مس ومش سحر مقصود ليها... أني مانبيش نظلم حد ولا نفكر في اي شي حالياً غير علاج أحلام وصحتها بس

المهدي ربت على كتفه  :  ربي يكون في عونك... أنتا انسان تقي ومؤمن وتخاف من ربي وبأذن الله ربي بيعطيك على قيس نيتك معاها ويصلح حالها

هز رأسه وتنهد  :  إن شالله

صوت ورأهم.. التفتوا لاثنين عليه.. كانت أحلام طالعة من داخل الاستراحة... المهدي طول دور وجهه عنها وطلع من البوابة.. ويعرب زم فمه بعصبية

رفع يده ومشى  :  هيا السلام عليكم.. نتلاقوا بعدين.. ربي يشفيها

نفخ وصكر البوابة... ورجع يعرب للاستراحة  وقرب منها واقفة بالفيراندا

وقف قدامها  :  خيرك طالعة هكي.. وين وشاحك؟!

شافتله وقلبت اعيونها  ومشت قمعزت على سور الفيراند القصير.. تربعت وقاعدة تأكل في سندويتش وطاسة شاهي

قعد ثواني يشوفلها.. وبعدين ابتسم بقهر ومشى قرب منها وقمعز مقابلها.. يبحت فيها ورافع حاجبه

رفعت اعيونها فيه وهزت راسها  :  نعم.. عليش اتشوفلي هكي إن شالله

يشوفلها وساكت

قلبت اعيونها ونفخت  : اوووفه  هذا شنو.. الواحد مايعرقش يسمسم براحته بكل... امشي من قدام وجهي

شاد ضحته وعاض على فمه...

قربت وجهها منه  :  تعرف راه والله قلة ادب هذه كان ماعندكش علم... عيب عيب تقمعز قدام الناس هكي وتقعد تفنص فيهم وهما يأكلوا...تحشم على وجهك

ابتسم  :  شن قاعدة تاكلي؟

تكلمت من غير اهتمام  :  تن وشاهي شن نبي ناكل؟!