أحلام يعرب (ليبية_منقولة)

الحلقة 103

#أحلام_يعرُب ((بين الحب والحرب))
#الحلقة_103((الفصل الخمسون_بشائر خير))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«الحمد لله ربّ العالمين، خلق اللوح والقلم، وخلق الخلق من العدم، ودبّر الأرزاق والآجال بالمقادير وحَكَم، وجمّل الليل بالنجوم في الظُلَمّ. الحمد لله ربّ العالمين، الّذي علا فقهر، ومَلَكَ فقدر، وعفا فغفر، وعلِمَ وستر، وهزَمَ ونصر، وخلق ونشر. الحمد لله ربّ العالمين، يُحب من دعاه خفياً، ويُجيب من ناداه نجِيّاً، ويكرم من كان له وفيّاً، ويهدي من كان صادق الوعد رضيّاً»
.
.
.
ممد على سرير في المستشفى ويشوف للممرضة اللي تغير في كيس التغذئية

خذت الكيس القديم.. دفعت عربة الادوية وتكلمت  :  بالشفي إن شالله

هز راسه ويادوب طلع صوته  :  الله يسلمك

طلعت الممرضة... وصدام غمض اعيونه وتنهد بتعب.. قبل مايفتحهم من جديد على رنة تليفونه... مد يده ولقطه... شافه وكان رقم غريب

عقد حواجبه ورد  :  الو

جاه صوتها في رعشة وخنقة وهي تبكي  :  ولدي وين... نبي ولدي... علاش خديته حرام عليك وحرمتني منه

ارتفع شوي وضيق اعيونه  :  مني انتي؟!!

مسرة ببكى  :  صدام نبي ولدي... زي ماخديته مني رجعوهلي مادخلنيش بيك... نبي ولدي حرام عليك نبيه

حس بقلبه انشق والسانه ارتبط ماعرفش بشن يرد عليها او كيف يواسيها

وهي لما سكت رجعت تتكلم من جديد  :  عارفة روحي غلطت في حقك.. وكنت حقيرة معاك... دير ماتبي في اني بس ولدي لا... بالله عليك جيبهولي زي ماخديته راهو قلبي تقطع عليه... بالله عليك بالله عليك نبي محمد.. الله يخليك ردوهلي ياصدام بنموت من خوفي عليه

قعدت تشهق وتبكي... وهو غمض اعيونه وحاس بالذنب وايديه مكتفات مش عارف شن يرد عليها او شن ايدير باش يطمن قلبها على ولدها

مسرة تبكي وبشوي حدة  :  الو... خيرك ساكت... رد عليا كلمني.... قولي ولدي وين... قولي كيف خليتهم يخطوفك منك.. وعلاش خديته مني من الاول وقهرتني عليه

رشفت خشمها وبلعت ريقها  :  مش مسامحاتك لو محمد صار فيه شي... بندعي عليك نهار ولليل وكل وقت  كان وليد حرمني من ولدي طول حياتي... كله منك...مش مسامحاتك... مش مسامحاتك ياصدام

صكرت الخط... وضمت روحها وغطت وجهها تبكي بحرقة... وصدام مازال يسمع في اخر كلماتها وقلبه يتقطع... واحساسه بالذنب زاد عنده

غمض عيونه وزفر بقوة... وشد في السرير لعند قمعز... نزل رجليه من الجنب.. وطبس راسه وهوا حاس بالم في كل انحاء جسمه

مع خشت كريم عليه واللي كان مرافق ليه في المستشفى... شافه مقمعز قرب منه  :  خيرك تبي شي