أحلام يعرب (ليبية_منقولة)

الحلقة 116

#أحلام_يعرُب ((بين الحب والحرب))
#الحلقة_116(( الفصل الثالث والخمسون _مسني الضُر 4))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهمّ يا مسهّل الشّديد، ويا مليّن الحديد، ويا منجز الوعيد، ويا من هو كلّ يومٍ في أمرٍ جديد، أخرجني من حلق الضّيق إلى أوسع الطّريق، بك أدفع ما لا أطيق، ولا حول ولا قوّة إلّا بالله العليّ العظيم، ربّ لا تحجب دعوتي، ولا تردّ مسألتي، ولا تدعني بحسرتي، ولا تكِلني إلى حولي وقوّتي، وارحم عجزي فقد ضاق صدري، وتاه فكري وتحيّرت في أمري، وأنت العالم سبحانك بسرّي وجهري، المالك لنفعي وضرّي، القادر على تفريج كربي وتيسير عسري.»
.
.
.
۞ عَـسَى رَبّــكم أَن يُـبَدِّل أحْزَانكُم فَرَحـًا قَريـبـًا ۞
.
.
.
الفرحة كانت عامة في كل ارجاء الامة الاسلامية بقدوم عيد الفطر... وليبيا من ضمن المسلمين اللي كانوا يجهزوا ليوم العيد

أحلام برغم حزنها على وضعهم... بس كانت اتحوس في حوش بوها.. اتضم وترد في كل شي لمكانه... واخر شي سيقت الحوش والقراج وخالد يساعد فيها باللي يقدر عليه

نشفت الممر وحطت بخور وقعدت ادور بيه في الحوش... سمعت صوت الباب انفتح وخش بوها وخوتها الاطفال

خشوا طول للصالة وفي ايديهم اكياس وفرج واجويدة في جرتهم... طلعت من الدار وحمزة شافلها وتكلم مبتسم  :  تعالي حقي باتي شن جابلنا

ابتسمت لخوها ومشت بالمبخرة نزلتها وقربت منهم  :  ماشاءالله ماشاءالله.. شن شريتوا

اجويدة  :  السلام عليكم... ايش اخبارك

شافت لعمها وهي تقمعز وسط خوتها   :  الحمدالله... شن اخباركم

تنهد ومشى للمطبخ  :  اتقول ايش... وين خالد

خش للمطبخ يشرب في امية واحلام ردت عليه  :  مش عارفة... توا كان هنا

تنهد فرج بتعب وقمعز في جنبهم... واحلام تفتح في الاكياس مع خوتها وتشوف لبوها شن شرالهم عشان العيد

كان شاري لكل واحد منهم قميص وسروال وسبيدرو... وتوتة... وكل واحد منهم يفتح في كيسه ويتفرج عليه وهو سعيد واعيونه يلمعوا بفرحة العيد

وفرج مد يده واعطاها كيس  :  هذا دبش خوك... دسيه له لعند يطلع بالسلامة

خذت الكيس وابتسامتها تلاشت بالتدريج وهي تشوف لملابس غفار... فتحتهم وتمس فيهم وحست بغصة في قلبها

اجويدة طلع من المطبخ مبتسم  :  ماشاء الله... تبيدوهم بالهنى إن شاءالله

فرج كان مركز مع بنته وشاف الدمعة في اعيونها وهي طبق في ملابس خوها وترجع فيهم للكيس

شاف لخوه  :  سلمك.. والله يرحم والديك تعبناك معانا

اجويدة  :  ياراجل... السيارة وقت ماتبوها تلقوها مدرسة عند الباب