أحلام يعرب (ليبية_منقولة)

الحلقة 8

#أحلام_يعرُب ((بين الحب والحرب))
#الحلقة_8((الفصل السادس بداية مختلفة))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«مابين القدر والنصيب هناك مقبرة.. دفنت فيها نصف مشاعر البشر» ♡
.
.
.
يلعبوا.. ويجروا في جرت بعضهم... يعيطوا.. وينقزوا من مكان لمكان.. وصوت صاخب من هرجتهم ولعبهم

طلعت من المطبخ وبين ايديها سفرة العشاء.. وجهها اصفر.. ويبان عليه التعب والارهاق... قدمت ونزلت السفرة قدام امها

رفعت وجهها ورأسها صداع وتكلمت بحدة  :  اسكتوا.. استكوا.. خلاص نفختولي رأسي من صوت دوشتكم... بروا العبوا في الجنان

الوسطي فيهم.. واللي كان اكثرهم حركة.. ويبان الشغب على وجهه... رفع حواجبه وحرك راسه بشكل مستفز  :  مانبوشي.. بوي قاللنا خشوا العبوا داخل

غمضت اعيونها وتنهدت بعصبية  :  باهي العبوا بالشويا.. شني الفوضى متاعكم هادي؟!

ابتسم بمكر  :  نلعبوا في حوش جداي.. مش في حوشك

فنصت فيه  :  تعرف نشدك نعطيك طريحة نباش القبور يافرخ انتا.. برا العب غادي

عتيقة  :  خلي الصغار في حالهم.. واحد ايدخلهم والتاني يلطلعهم.. دوختوهم في جرتكم

رفعت شعرها بعصبية  :  قلبوا رأسي بدوشتهم وعياطهم.. عادل علاش يدخل فيهم علينا

عتيقة  :  خوك معاه ناس في الشارع.. توا يخش يغبر يومنا.. خلي الصغار يلعبوا بحدانا واسكتي

زمت فمها  : وهما علاش يومين والتالت ملمومين عندنا.. ماهو كل وحدة تشد خربتها وتقمعز  فيها

عضت فمها  :  عيب يابنتي يسمعوك اخواتك...هما كل جمعة يلتموا بحدايا ماليكش دخل بيهم يجوا والا يروحوا مش شورك

رفع حاجبه بتهكم  :  جايين باش نباركوا بعرس يعرب

فنصت فيه بعصبية  :  قليل الادب والله انوض نعطيك طريحة ياحيوان

ضحك ويدير في حركات بيديه  .. وهيا تبي تنوض تضربه وعتيقة شدتها  :  قمعزي بلا اهبال... يطلعوا عقلك الصغار

شافت لامها بغضب  :  سمعتيه شن قال الحقير.. ارباية الحربة نسرين

خشوا اثنين في جرت بعض.. وحدة جايبة سفرة عشاء ثانية  والاخرى سفرة مشروب وامية

نزلت السفرة وشافت لنجمة برفعة حاجب  :  خيرها نسرين؟!

عتيقة بلعت ريقها بتوتر  :  مش شورك يابنتي.. تقصد على لاولاد

نسرين  :  خيرهم لاولاد.. شن مدايرين  ؟ 

نجمة  :  ولدك هادا اللي اسمه سند قليل ادب ومش متربي

نخزتها امها  :  اسكتي عيب

حطت يدها بخصرها وشافت لولدها   :  علاش شن دار  ؟