أحلام يعرب (ليبية_منقولة)

الحلقة 96

#أحلام_يعرُب ((بين الحب والحرب))
#الحلقة_96((الفصل السابع والأربعون_أنت لي 5))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«يا ربّ اللهمّ إنّي ومن ظلمني من عبيدك، نواصينا بيدك، تعلم مستقرّنا ومستودعنا، و تعلم متقلبنا ومثوانا، وسرّنا وعلانيّتنا، وتطّلع على نيّاتنا، وتحيط بضمائرنا، علمك بما نبديه كعلمك بما نخفيه معرفتك يا الله ما نبطنه كمعرفتك بما نظهره، ولا ينطوي عليك شيء من أمورنا، ولا يستتر دونك حال من أحوالنا، لا لنا منك معقل يحصّننا، ولا حرز يحرزنا، ولا هارب يفوتك منّا
اللهمّ إنّ الظالم مهما كان سلطانه لا يمتنع منك فسبحانك أنت مدركه أينما سلك، وقادر عليه أينما لجأ، اللهمّ إنّي أستغيث بك بعدما خذلني كلّ مغيث من البشر، وأستصرخك إذ قعد عنّي كلّ نصير من عبادك، وأطرق بابك بعدما أغلقت الأبواب المرجوّة»
.
.
.
وقت ماكان راجلها يقنع فيها عشان اترد معاه للحوش خاله... كان في نقاش داير في حوش اسماعيل بن ساسي بين عويشة وفطيمة

تكلمت بحزن  :  ياودي البنت هادي حظها بالهون... مش عارفة امتى بتستريح زي الناس

عويشة  :  بنت يتيمة وماشافت شوي في عمرها... واللي يدير معاها حاجة شينة والله ماينظر خير سوء توا والا بعدين... ربي في الوجود ماينسى حد

فطيمة  :  إن شالله ربي ياخد حقها من كل حد دار فيها الشينة وخرب فرحتها... حسبي الله ونعم الوكيل فيهم

عويشة تنهدت... ومشت بافكارها بعيد وقريب وهي تفكر في وضع احلام وكل حاجة صارت معاها... وخاصةً كلامها مع فطيمة لما جت للشرق وحكتلها عن احلام وكيف تزوجها يعرب وظروف عرسهم... تنهدت بحزن

وبعدين شافت للفطيمة  :  البنت هادي مكسورة جناح وماعمرها شبحت يوم باهي... وسامحيني فيها ياوخيتي لكن الحاجة من اولها... قصدي من يوم عرسها وفرحتها ناقصة وماندارلهاش عرس مقوم زي الناس

فطيمة  :  معاك حق.. لكن ياعويشة ماغباك في الحال... الظروف كانت ماتسمحش في هاداك الوقت.. لاحني ولا هي.. حتى هما وقتها كان خوها كيف مفقود وماقدروش ايديروا عرس

عويشة  :  بختها مسيكينة... حاستها تبي شي يرفعها من الهموم اللي شبحتها في حياتها كلها... تبي جبرت خاطر مقومة تنسيها كل اللي شافاته وتعوضها اللي فات من عمرها

فطيمة  :  اي صدقتي... حتى راجلها مفكر فيها ويبي يفرحها في العرس هادا... مشي جابلها دهب كامل يبيها تلبسه في العرس وتفرح بيه

عويشة  :  سلمه جياب... لكن المراة اللي ريتها اني الدهب والله ماتعدل عليه... اوينها مشت باعته عادي لما بوها احتاج... معناها الدهب والفلوس مايعنولها شي... اني قول خاطري البنت هادي تفرح بالكلمة الطيبة  والاهتمام والطبطيب على كتفها اكتر... تبي اللي يحسسها انها بين اهلها وناسها ويحن عليها ويفرح قلبها