أحلام يعرب (ليبية_منقولة)

الحلقة 31

#أحلام_يعرُب ((بين الحب والحرب))
#الحلقة_31((الفصل الثامن عشر نهاية عام وبداية جديدة))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم اعوذ بك من شر النفاثات في العقد ومن شر حاسد اذا حسد  يا مسهَلْ الشديد ويا ملين الحديد ويا منجز الوعيد ويا من هو كل يوم في أمر جديد، أخرجني من حلق الضيق الى أوسع الطريق بك ادفع ما لا اطيق، ولا حول ولا قوة الا بالله العلي العظيم»
.
.
.
30 / 11 /2014 يوم الاحد
.
.
حاس بتعب... وناعس... مدد جسمه على الصالون.. حط راسه على المخدة وغمض اعيونه... وأفكاره مشت بيه لكم اسبوع فاتوا.... لايام ماكان مسجون في صبراتة.

فلاش.. باك.. ⬇️
.
.
صوت حد يتكلم... وخطوات تقرب منهم.... صوت طقت المفتاح... رفع راسه على صوت باب السجن انفتح

دخل واحد... ومعاه اثنين من الحراسة... شاف يعرب ابتسم بتهكم

عقد حواجبه ايشوفله زين.. والشخصية اول مرة اتمر عليه

قرب منه.. وقف قدامه ورفع حاجبه ومبتسم بمكر :  يعرب خيري الحواتي.... واخيراً شرفتنا

هز راسه بتساؤل  :  نعرفك أني؟!

توسعت بسمته  :  ماتعرفنيش... بس أني نعرفك مليح

نزل رجليه بالارض وقف وتكلم بحدة :  نقدر نعرف علاش حاجزيني هنا.. شن تبوا مني

الشاب قرب منه  :  توا تعرف الصبر بس علاش مستعجل

يعرب بعصبية  :  مستعجل لاني بنطلع... شني اللي شفتوه مني باش تحبسوني.. لاجيت جيهة حد ولا درت شي غلط

ابتسم بتهكم وزاد قرب منه  :  مازلت تحكي بنفس الغرور والتكبر... ماتتعلمش من تجاربك من قبل

عقد حواجبه  :  اي تجارب؟!!... على شنو تدوي بالضبط.. احكي اكويس وفكني من الف والدوران

الشاب مد يده وشده من ياقة تيشرته وقربه ليه وتكلم متهكم عليه  :  ماهو قتلك أني من قبل ارخي روحك وخود واعطي في الكلام وخلك متفاهم... لان الجماعة ايديهم طايلة ويقدروا ايطبوك في اي وقت ويجبوك لينا... وأنتا ماشالله عليك جيت برجليك لعندنا... ومع هادا مازلت قايم خشمك وتهدرز بكل وقاحة ومش معبر حد

عقد حواجبه يفكر لثواني ويربط في الكلام في بعضه... واعيونه لمعوا بغضب لما قدر اخيراً يتعرف على الشخصية اللي قدامه

رفع يده بعصبية ونزل يد الشاب من على ياقة تيشرته.. وضربه بقوة على وجهه بيده الثانية... ترنح وطاح طول قدامه

نزل عليه قمعز على بطنه... وشده من دبشه وقرب وجهه منه  :  نبيهالك من يومها...تحساب روحك راجل لما تهددني على التليفون... ولا فوق هكي جاي وتتكلم معاي بكل عين صحيحة ومازال تهدد فيا ياكلب... بالك تحسابني بنخاف منك والا من اللي باعتينك ليا