أحلام يعرب (ليبية_منقولة)

الحلقة 44

#أحلام_يعرُب ((بين الحب والحرب))
#الحلقة_44((الفصل الثاني والعشرون.. إنتكاسة)))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«أدعوك يا إلهي دعاء من اشتدت به فاقته وضعفت قوته وقلت حيلته، دعاء الغريق الملهوف المكروب المشغوف الذي لا يجد كشف ما نزل به إلا منك، لا إله إلا أنت فارحمنا يا أرحم الراحمين»
.
.
.
الثلاثاء  10 /2 / 2015 بعد العصر
.
.
كان يعرب واقف عند الباب الخارجي للحوش من بعد نقاشه مع نجمة في المربوعة ⬇️

جبد من دخانه وضيق اعيونه  :  والشخص هادا مالي يدك منه انتا.. قصدي تقدر تعتمد على معلوماته وفيه ثقة

عبيدة  :  على حسب المعلومات اللي عندي انه مصدر ثقة.. اساساً هوا هارب من درنة لانه خاف على روحه منهم..وماقبل قدر يهرب لطبرق ويبلط منهم لانه يعرف معلومات واجد عنهم.. وبعدين نحنا نمشوا ونحكوا معاه ونشوفوا شن عنده ونقدورا بعدين نحكموا شن وضعه بالضبط

مسح لحيته وتنهد  :  اااايه تمام... بس المشية لطبرق في الوقت هادا فيها مخاطرة وخاصةً لينا.. تعرف وضع الطريق بين درنة وطبرق والكلاب هادوا منتشرين في محيط درنة كلها

حرك يده في شعره الاسود  : اها تمام نعرف والله.. اممم.. باهي ريت اسمع.. في اوليد من القبة نعرفه معرفة وثيقة وعندي معاه دلالة وديما يجي لبنغازي وانا نمشيله وشاب مش عادي يعجبك.. شن رايك انسق معاه نمشوا مع بعضنا وهوا خبرة يزبط الطريق اكويس وحتى طبرق يخبرها بالشارع

شد جبينه  :  متاكد منه عبيدة؟

ابتسم  :  انقولك صاحبي ورفقة ولما اتلاقى معاه توا تعرفه وتفهم قصدي

نزل تليفونه وشاف لشاشة لاقى جمال يتصل بيه  :  اي تمام تمام. عبيدة شوفه ونسق معاه واتصل بيا قولي شن صار معاك

عبيدة  :  تم ياطيري.. هيا المشية ممكن بعد اسبوع او عشرة ايام.. قبلها بيومين انكلمك ونقولك

يعرب  :  خلاص امالا نرجى منك في تليفون

عبيدة  :  تمام بكل..بينا تليفون.. ماتوصي على شي

يعرب  :  نبيك طيب.. سلم على الشباب كلهم

عبيدة  :  يوصل ياغالي.. سلام

يعرب  :  بالسلامة

صكر عبيدة.. ويعرب فتح على مكالمة جمال  :  نعم

جمال  :  الو يعرب.. وينك

جبد من دخانه  :  في الحوش.. خيرك

جمال طلع من الاستراحة  :  الشيخ يتصل بيك مشغول.. طلع من عندنا وقال متسقد شورك.. خليك في الحوش

حذف عقاب السبسي ونفخ  :  اي جمال اساساً قاعد في الحوش نرجى فيه

جمال  :  تمام