أحلام يعرب (ليبية_منقولة)

الحلقة 61

#أحلام_يعرُب ((بين الحب والحرب))
#الحلقة_61 ((الفصل الثلاثون وا معتصماه))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم طهر قلبي واستر عيني واغفر ذنبي واشرح صدري واحفظ أحبتي واكفني شر ما في الغيب واختم بالباقيات الصالحات أعمالي»
.
.
.
قبل مايوصل للحوش بالحظات.. اتصل بخوه

والاخير كان في سيارته حتى هوا ومروح بامه واخواته للحوش

ضرب تليفونه ورد  : الو

يعرب  :  الو جمال.. شن صار معاكم

جمال  شاف لاخته في المراية مقمعزة في الخلف  :  الامور تمام.. المستشفى دارولها خروج واني مروح بيهم للحوش

يعرب  :  شن حالها اختك.. صحتها باهية

جمال  :  الحمدالله بخير... احسن من امس

فطيمة في جنبه  : منو يكلم فيك

جمال  :  هادا يعرب يأم

يعرب  :  اسمعني جمال.. اني بنزل احلام على حوش وعندي امور نبي نظمهم قبل مع سيف.. أنتا وصدام خلوكم في الحوش واي جديد اتصل بيا طول

احلام شافتله وساكتة

جمال  :  باه لو جي حد من اهل عزالدين شن بندير معاهم

يعرب  :  مافيش حد بيجيك امس بوه اتصلت بيه وتفاهمت معاه وقالي بينكم بينه.. اساساً هما مايعرفوش علاش ولدهم دار هكي مع عروبة.. ومادام مش فاهم شي مافيش حد منهم بيجيكم الا لو نساوين.. وهادم بينهم بين امك

جمال  :  باهي انتا شن بدير معاه توا

يعرب بحدة  :  أني وسيف مش مروحين للحوش الا بعد نلقى التافه هادا ونعطيه على راسه.. مانبيش انخش على اختك الا واني واخذ حقها وحاط كل حد في مكانه الصح

تنهد ومرر يده بشعره  :  باه تمام

يعرب  :  بالسلامة توا واي جديد كلمني

جمال  :  سلام

صكر يعرب وجمال تلفت على امه تسأل فيه  :  خيره خوك.. شن يبي منك

جمال  :  يسأل عن عروبة

فطيمة  :  ماقالش شي عن المرزي عزالدين

عروبة حركت راسها وشافت لخوها شن بيقول

جمال  :  قال تكلمت مع بوه واهله مايعرفوشي علاش ولدهم دار هكي فيها ويعرب مازال يدور عليه

فطيمة بحمق  :  إن شالله يعتر فيه ويعفجه طريحة باهية هالمسخ

عروبة اعيونها مدمعة  :  لكن يعرب بروحه مريض راهو واني خايفة عليه

جمال شافلها من المراية  :  ماتخافيش عليه مش بروحه.. معاه سيف وقال مش مروح لحوش لعند يلقاه و يرد حقك منه