أحلام يعرب (ليبية_منقولة)

الحلقة 42

#أحلام_يعرُب ((بين الحب والحرب))
#الحلقة_42 ((الفصل الواحد والعشرون سقوط جماعي_فبراير الحزين))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم إنّي أعوذ بك من الهمّ والحزن، وأعوذ بك من العجز والكسل، وأعوذ بك من الجبن والبخل، وأعوذ بك من غلبة الدّين وقهر الرّجال»
.
.
.
يوم الاثنين  9 / 2 /2015  بعد الظهر ⬇️
.
.
في الوقت اللي كان يعرب متواجد في مبنى الامن الداخلي ويحاول يلم الفضيحة ويستر اللي يقدر يستره
كانت أحلام في الجامعة مع يقين وماتندري على شي.. مقمعزات في نهاية حرم الجامعة..تحت الشجر..في المكان يلي يقمعزن فيه البنات لما يبن يفطرن بعيد عن دوشة وزحمة الشباب..«اللي قرت في الجامعة الجديدة تعرف المكان اكويس»
.
.
شافت لعيون صاحبتها بحزن وهزت رأسها مبتسمة بالم  :  لاني نعرف كل شي وعشت معاك كل لحظة بالحظة مش قادرة انلومك بصراحة

كانت اتشوف لبعيد وسارحة واعيونها معبية حزن و وجع وفيهم لمعة دمعة تحاول تشق طريقها وتنزل على خدها.. بس أحلام مانعتها

تنهدت وشافت لصاحبتها  :  لو بتلوميني عادي.. اساساً انا بروحي لما نشوف نظرة الكره في اعيونه ليا نندم ونقوله ياريت ماتكلمت معاه وقتله اي شي... وبعدين ايصير شي ثاني ونلقى روحي نعطي في الحق لكل تصرفاتي وكلامي معاه من جديد

رفعت يقين حواجبها  :  المراة شكلها انجنت.. قصدي وضعها بدا يخوف واقسم بالله.. أنا لو في مكانك انقول ليعرب شن دارت معاي خليه ايوقفها عند حدها

رفعت اكتافها  :  مانعرفش.. بس ماقدرتش انقول شي.. هوا يعرب معادش انشوف فيه زي قبل.. وبعدين لو تصدقي بقد ماخفت منها وفجعتني.. بقد ما وجعني حالها وحسيت بحرقة قلبها على ولدها.. معاش عرفت انلومها او نعذرها

يقين  :  بالله عليك أحلام معاش تحسي بالذنب على اي شي.. قصدي كل شي صار لعند توا مالكش يد فيه ولا اي ذنب.. وكله مكتوب من ربي العالمين

بلعت ريقها ومسحت وجهها بيديها وتنهدت بتعب  :  ياريت نقدر انحس زيك هكي ومايكونش في اي شعور بالذنب.. يقين أنا عشت مايقارب ست شهور مع يعرب مالحقتش انتهنى معاه حتى يومين وراء بعضهم من غير مشاكل وقصص...في كل مرة انحس معاه بالسعادة ونقول خلاص كل شي تمام وبكرا نقدر ننسى كل شي ونبدأ معاه صفحة جديدة.. نلقى مشكلة جديدة انفتحت في حياتنا ونلقى روحي عايشة عذاب جديد والم اكبر من اللي قبله.. وياريت بروحي.. كنت تحملت وسكتت.. لكن في كل مرة اندخل في حد معايا في مشاكلي وهمومي

يقين بزعل  :  اللي صار كان غصباً عنك وعن يعرب.. المشاكل والهموم اللي تحكي عليهم كانوا بسبب ناس ثانية وانتي كنتي الضحية أحلام

تكلمت بحرقة  :  مش بروحي ضحية مش بروحي .. كان يعرب معاي في وسط المحرقة...يحاول مايظلمنيش.. يدافع عليا.. ياخذ حقي.. ومع كل خطوة منه.. كان ينولد عدو جديد ليه ويلقى روحه متزاعل مع حد من عيلته عشاني