أحلام يعرب (ليبية_منقولة)

الحلقة 57

#أحلام_يعرُب ((بين الحب والحرب))
#الحلقة_57((الفصل الثامن والعشرون رفقًا بالقوارير 2))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم إنّي أسألك في صلاتي ودعائي بركة تطهّر بها قلبي، وتكشف بها كربي، وتغفر بها ذنبي، وتصلح بها أمري، وتغني بها فقري، وتذهب بها شرّي، وتكشف بها همّي وغمّي، وتشفي بها سقمي، وتقضي بها ديني، وتجلو بها حزني، وتجمع بها شملي، وتبيّض بها وجهي يا أرحم الرّاحمين»
.
.
.
الاربعاء  1 / 4 /2015
بنرجعوا لوقت الظهر 
كان يسوق في سيارته ومروح للحوش
باله مشغول وقاعد يحاول يتخيل شن ممكن يلقى قدامه
شن الدليل اللي تكلم عليه خوه.. واللي المفروض ايشوفه عند جمال
الطريق من الوسيطة لوسط البيضاء كانت طويلة على صدام
الخوف والتوتر سيطروا عليه.... وحس بوخز في قلبه وبينه وبين نفسه حاس انه في صدمة كبيرة بيتلاقها عند وصوله للحوش

وقف تفكيره لما وقف سيارته وركنها قدام الحوش

نزل منها وتوجه طول لداخل الحوش... خش يدور عن جمال

والاخير كان مقمعز في المربوعة ويراجي فيه  .. وحتى هوا حاس بتوتر وقلق... مش سهل ابداً تكشف حقيقة أنسانة قريبة لخوك.. ومش اي أنسانة.... هذه زوجته واللي متخيل انها حامل بطفله بين أحشائها  ... وقاعد ينتظر في هاليوم بالساعة والدقيقة
يعني الصدمة بتكون صدمتين..
ويااااااه على قلب صدام قدايش بيتحمل والا يتحمل... ضربتين على الراس يوجعوا... يوجعوا واجد... واجد بكل
.
.
وقف بباب المربوعة وشاف لخوه   :  سلام

رفع جمال اعيونه معاه  :  اهلين

حول كندرته وخش عليه  :  اتصل بيك يعرب

بلع جمال ريقه  :  اي اتصل بيا من اشويا

قرب من خوه ومد يده ويبان بوضوح توتره وخوفه   :  وينه الدليل اللي تكلم عليه.  . شن هوا خليني نشبحه

ساوى قعدته  :  استهدي بالله وتعالى قمعز وبتشوف وتسمع كل شي

عقد حواجبه وقمعز مقابل خوه  :  نشوف ونسمع  ؟!!  علاش الدليل فيديو والا شني؟!

شاد بيده التليفون.. تكلم بنبرة حزن  :  اي فيديو... بس بالله عليك صدام.. لما تشوفه نبيك تشد اعصابك اشويا وتفكر اكويس قبل مادير اي تصرف معاها

تكلم بحدة وماد يده لخوه  :  باه هات البلي فيسع ماتحرقش دمي اكتر ما هو محروق ياجمال

تنهد وفتح التليفون ومده لخوه  :  شد اهوا... افتح الفيديو هادا

خذا منه التليفون... وحاول يفتح الفيديو طول.. لكن في الاول ومن رعشة يده مرر الفيديو للي بعده

زفر بعصبية ورجع الفيديو من جديد.. مسح جبينه وفتح الفيديو

يبدأ التسجيل بصوت الضابط.. وهوا يعطي في نبذة عن نوع الجريمة اللي قاعد يحقق فيها