أحلام يعرب (ليبية_منقولة)

الحلقة 109

#أحلام_يعرُب ((بين الحب والحرب))
#الحلقة_109((الفصل الثاني والخمسون_حرب شرسة))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«ربي إنيّ أسّألك أنّ تريحَ قلبيّ وفكريّ وأنّ تصرفَ عنَّي شتاتّ آلعقلّ وآلتفكيّر .. ربَّي إنّ فيَ قلبيّ أمَوراً لا يعَرفهآ سِواك فحققّهآ ليَ يآ رحيمّ .. ربي كنّ معيُّ فيّ أصَعبّ آلظروفّ وأرينيّ عجآئبّ قدرّتك فيّ أصعبُ آلأيامَ»
.
.
.
وسط مربوعة عيت حفيظ... كانوا الرجالة مقمعزين.. وكل مجموعة او جيهة يهدرزوا في شي

مرر نظره عليهم لعند استقروا على نسيبه... مقمعز واحد من اولاده في غمره ويفتحله في طرف شكلاطة.. ويهدرز مع ولده الثاني ويضحك

قعد مركز عليهم ثواني وبعدين غير نظره عنهم لقى اجويدة يشوف معاه لنفس الجيهة... ابتسم والاخير ردله الابتسامة وتنهد قبل يتكلم : سبحان الله ياراجل... فرحان بيهم واجد

يعرب : اي... اولاده وليه فترة طويلة ماشافهم شي طبيعي يرايف عليهم هلبا

اجويدة : تعرف احسن حاجة دارها خالد مشى خذاهم من جازية الشيطانة غصباً عنها

يشوف لاخوات أحلام : خالد مايخافش ومتهور شوي... عندي واحد زيه في الحوش

ابتسم اجويدة... ويعرب تنهد وشافله و تكلم بقلق : لكن المراة هادي زي ماقلت انت... شيطانة ومش بنادمة استغفر الله... اكيد بيكون ليها ردة فعل ومش حاتسكت

اجويدة : صدقت... حتى نا خايف منها ادير شي بدعة بعد تفقدهم

شاف حوله.. ورجع بعيونه لاجويدة : لازم نقعدوا حذرين ونتوقعوا كل شي الليلة مش حتمشيها بالساهل

حرك اعيونه لاخوه ويشوفله كيف منسجم ويتكلم ويلعب مع اولاده وتنهد بقلق : ربك يستر إن شاءالله
.
.
.
************«روايات أم ناصر»
.
.
.
في داخل الحوش كانت أحلام تهدرز مع ضيوفها وخوها الصغير في حجرها ولفة ايديها حوله بحب

بعد وقت نزلت اعيونها وشافت للملابس غفوري.... كان دبش حوش وفيه بقع... بحكم انهم اطفال وكانوا يلعبوا وطلعوا من الحوش من غير علم امهم.. فكان دبشهم امبهدل شوي

وقفت واستأذنت من ضيوفها ومشت خذت غفوري للحمام... غسلت وجهه وايديه ورجليه... وبعدين طلعت ومشت بيه لدار اللي فيها دبشها وشناطيها

كان في كيس كبير جايبة فيه هدايا لاخوتها من طرابلس... فتحت الكيس وكان فيه علبة شكلاطة... وملابس

اربع تيشرتات صيفية... وكل تيشرت معاه شرت جينز ازرق... قمعزت غفوري وبدت تبدله في ملابسه

اما الاخير كان يشوف لعلبة الشكلاطة... لابسته التيشرت وهو سأل : هذا ليا

ابتسمت : اها... عجبك

هز راسه وطبس يشوف لتيشرت : سمح...ايش مكتوب عليه

أحلام وقفته وتلبس فيه الجينز : مكتوب عليه هيرو... يعني بطل