أحلام يعرب (ليبية_منقولة)

الحلقة 71

#أحلام_يعرُب ((بين الحب والحرب))
#الحلقة_71((الفصل السادس والثلاثين أنقشع الظلام))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم أزِح من قلبي كل خوفٍ يسكنني، وكل ضعفٍ يكسرني، وكل أمرٍ يُبكيني، وافتح لي أبوابي المغلقة
اللهم اجبر كسر قلبي جبراً يتعجّب منه أهل السماوات والأرض، جبراً يليق بكرمك، وعظمتك، وقدرتك يا رب»
.
.
.
عضت يقين صبعها وغمضت اعيونها زين لما حست بقلبها انشق علي صاير في صاحبتها

تفتح في شعرها وايديها ترعش  :  الله يعطيها ضربة ويكسر ايديها... بشن ضاربتك الهمجية هذه... ووووك عليا

غمضت اعيونها وحست بقشعريرة سرت مع ظهرها وهي تشوف في خياطة الجرح

رفعت رأسها.. ساوت شعرها.. وحطت وشاحها..وتحكي بحرقة   :  فجعتني ومعاش عرفت كيف نتصرف معاها.. وياريت كانت بروحها لكن معاها اختها وخفت منهن يضرن العيل اللي في بطني

حطت يدها على كتفها بخوف  :  أنتي بخير والعيل بخير صاح

ابتسمت بحزن وهزت راسها وهي اتحط في الدبوس في وشاحها  :  لا الحمدالله أنا بخير والجنين بخير... أساساً انا كل همي كان أني نحمي اللي في بطني وخلاص وهذا اللي خلاها تضربني على رأسي

قربت منها بأهتمام  : كيف صار معاك بالضبط... امتى جوك وشن يبوا منك هالمجرمات

لبست أحلام الخمار ورفعاته فوق للخلف.. تنهدت بتعب وبدت تحكي ليقين على جية جازية واختها يوم السبت

#فلاش_باك ⬇️
.
.
فتحت الباب وبانت عليها صاحبة الصوت وفي جنبها وحدة... خذت خطوة للخلف ودقات قلبها بدت اتزيد وترتفع

قدمت منها بوجهه متجهم ودفت الباب بقوة  :  حلي الخرا عليش مصكرته

مازلت شادة الحديدة متاع الباب في يدها.. تكلمت بتوتر  :  شن تبي جازية

قربت منها وفي جرتها اختها  :  جاية الحوشي والا تريدي تاخذيه مني حتى هوا

أحلام  :  الحوش حوش باتي وماعندكش فيه شي.. وبعدين كيف عندك وجهه اتجي هنا بعد اللي درتيه فيه وعزقتيه ابروحه مريض ومشيتي سيبتيه على الزليز

جازية برفعة حاجب وتحكي بيدها :  بوك يبي معاناة ونا غير إن شالله انعاني روحي وعويلتي.. وبعدين جريت عليه واجد وصرفت فلوسي كلهن ومعاش عندي له شي وماباش يبرا وكل يوم اعطب من يوم وقعدوا هلي يصرفوا عليه

احلام  :  لكن هذا راجلك وأب عيالك.. ويما وقف معاك ودار عشانك وفي النهاية لما مرض سيبتيه ومشيتي خليته بروحه

جازية  :  جبته لحوشه وقريب من خوته عشان يشقوا بيه كلا نا وهلي ماعندنا بيش نصرفوا عليه وعلى علاجه اللي بلا فايدة... وبعدين أنتي عليش اتناقشي فيا... مش جيتي لعند حوش هلي وقعدتي اتزرقي في عيونك و اتحززي وتبي تشوفيه... اهو جبته لك اشبعي بيه عليش تحاسبي فيا والا مليتي منه خلاص