أحلام يعرب (ليبية_منقولة)

الحلقة 115

#أحلام_يعرُب ((بين الحب والحرب))
#الحلقة_115((الفصل الثالث والخمسون_ مسني الضُر 3))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهمَّ إني عبدُك ابنُ عبدِك ابنُ أمَتِك ناصيَتي بيدِك ماضٍ فيَّ حُكمُك عَدْلٌ فيَّ قضاؤُك أسألُك بكلِّ اسمٍ هو لك سميتَ به نفسَك أوْ علَّمْتَه أحدًا مِنْ خلقِك أو أنزلته في كتابِك أو استأثرتَ به في علمِ الغيبِ عندَك أنْ تجعلَ القرآنَ ربيعَ قلبي ونورَ صدري وجلاءَ حُزني وذهابَ هَمِّي»
.
.
.
.
.
************«روايات أم ناصر»
.
.
.
طول الطريق وهي تشوف لشوراع ودمعتها على خدها...والاطفال متكين عليها من التعب وهي عقلها قريب ينفجر وحاس بقلبها مقبوض والدنيا ضاقت بيها

وصلوا للحوش... فتح خالد الباب واحلام نزلت مع خوتها وخشوا للحوش... وخالد يفتح في القراج وبيحط السيارة

احلام خشت مع خوتها... حولت عباتها والاطفال قمعزوا في الصالة... طلعت للقراج اتشوف لخوها يخشش في السيارة

وقفها ونزل يصكر في بابها واحلام تكلمت : كيف... وين سيارة باتي

رفع اعيونه وزفر بقوة : بالله خليها ساكتة

عقدت حواجبها : خير شن صاير اخرى

لف من حول السيارة وجاءها قرب منها : السيارة تاخذ سوك

انفرج فمها شوية شدت على قلبها : كيف يعني... انسرقت والا شنو

خالد : انسرقت امس في الليل... وبعدين القيناها محروقة على الطريق

انفتحت اعيونها بصدمة وتجمعوا فيهم الدموع : لا اله الا الله سبحانك أني كنت من الظالمين... يارب عفوك ورحمتك يارب شن قاعد يصير معانا

مد يده لكتفها : الله غالب.. هذا بختنا عاد... واللي كاتبه ربي بيصير

مسحت دموعها : جازية وراها

شافلها عاقد حواجبه : شنو؟!!

احلام تلفتت وراها لخوته يتفرجواعلى التلفزيون في الصالة... ورجعت شافت لخوها : السيارة والله ماتخطى جازية وخوها

ابتسم بتهكم : والله من امس انقول فيها لهم لكن ماحد عدل عليا.. وبعدين صارت الكارثة هذه التهينا فيها

أحلام : المصيبة هذه حتى هي من تحت راس جازية وعوض... يعرب اللي خلاه مشى تهجم عليهم لانهم حرقوا رزقه ورزق خوته

عقد حواجبه : شن قصدك... شن صاير اخرى

أحلام بحمق : عيت عمي عندهم مخازن في المنطقة الصناعية... كانوا فيهم بضاعة جديدة وكبيرة.. بضاعة كلفتهم واجد وامس الفجر ناضوا على نار شايطة فيهم وماطقوا يطفوها كلت كل شي

خالد : يعني في نفس الليلة اللي انحرقت سيارة بوي

احلام : اممم.. واضح من وراها الحكاية مش صدفة ابداً... اصلاً عوض له فترة يراقب فينا من بعيد ويعرب شاك فيه طول ولما صارت حرقت المخازن واحد من حرس المخازن بلغ عن سيارة عوض وقال شافها اكثر من مرة تحوم في المكان ويعرب لما سمع طلع معصب ومشى لحوش عيت اقويدر