أحلام يعرب (ليبية_منقولة)

الحلقة 63

#أحلام_يعرُب ((بين الحب والحرب))
#الحلقة_63 ((الفصل الواحد والثلاثون ليالي السُهاد 2))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم قرب الفرح لنا و أغدقه علينا غيثا مدرارا و اجمعنا به في خير الأوقات معا
ضاقت قلوبنا يا الله، كسرت خواطرنا، فسألك الجنة، نسالك الغفران»
.
.
.
رفعت الولد بين ايديها وعلت صوتها  :  تعالى ماما أكيد هنا

سمعوا صوتها بقرب الغرفة نغزتها وسكتوا وهيا خشت عليهم

مبتسمة وبين ايديها أحمد  :  اهي ماما قاعدة هنا ونحنا اندوروا عليها

بلعت ريقها وشافت لحماتها بأرتيأب  :  اهلين ياحبيبي.. كيف صار.. نزل بروحه والا شني

قربت منها واعطتها ولدها  :  القيته مقمعز على الدروج وشكله مازال ناعس ويبيك

ضمت ولدها وباسته  :  اكيد نايض ومش ملاقيني بحداه فتح الباب ونزل ابروحه

عروبة شدت يد ولد خوها وباستها  :  ياحليلي على النعوسة اني.. ياوخيتي رقد طول محلاااه

هناء  :  حي على الفالحات اللي وصيتهم على خوهم.. طالع بروحه ومايندروش عنه بكل

أحلام  :  شكله نايض ومش لاقي حد نزل وبعدين قمعز ورقد على الدروج

عروبة  :  باهي اللي شبحتيه كان هادا نومه تقيل وراهو تكركب لتحت وهوا راقد ياناري

باست ولدها وضماته زين لحضنها  :  بعيد مية سوء على وليدي حبيبي... رفعت وجهها لاحلام وعقدت حواجبها.... لكن أنتي مش قلتي بنمشي انقيل اشويا فوق خيرك نزلتي تاني والا نوضك احمد

تنهدت بملل وأتكت على الحيط وهي واقفة  :  لا والله... حاولت نرقد واجد ماقدرتش والشقة ماقدرت اندير فيها شي.. يعرب مازال راقد وخفت انوضه يعصب عليا

عروبة   :  خيره يعرب.  . لاتغدى معانا ولا ريناه بكل اليوم... مريض والا شنو

قلبت شفتها  :  مش عارفة والله... بس لما روح بيا من الجامعة حسيته معصب بكل وكأنه صاير معاه شي لكن ماقدرتش نسأله وقالي مانبيش نتغدى ونبي نرقد

هناء  :  ياوخيتي حرام مارقد ولا قعد زي الناس وهوا يلود من مشكلة لمشكلة حتى وهوا مريض ماخليناه يستريح حتى يوم واحد

عروبة شدت ايديها في بعض ومطت فمها بزعل  :  كله من هبالي وزيجتي الغبرة من الحقير هاداكا الله لايسامحه

هناء  :  نصيب عاد.. شن عرفك بيقعد يدور عن المشاكل ويحفرلك مع صاحب خوك هالتافه

تكلمت بعصبية  :  زاد التاني الهم لاحرف شن خلاه يرد عليه ويراسله هالبارد هادا ديما حاشر خشمه في كل شي دره الكبد وين مانمشي نلقاه في وجهي

عقدت حواجبها  :  قصدك عبيدة؟!!  ياوخيتي حرام راهو زيك حتى هوا مايندري على شي

عروبة  :  بارد ولاصقة.. ايامات يعرب في المستشفى قاعد زي البخت وكأنه واحد من العيلة وحتى في مصر لما اتصلت يرد عليا لعند عقدني هلبا... وختمها بعملته هادي خرب حياتي بكل