أحلام يعرب (ليبية_منقولة)

الحلقة 114

#أحلام_يعرُب ((بين الحب والحرب))
#الحلقة_114((الفصل الثالث والخمسون_مسني الضُر 2))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهمَّ إنّي أنتظر فرجك، وأرقب لُطفك، فالطف بي، ولا تكلني إلى نفسي ولا إلى أحدٍ من خلقك طرفة عينٍ ولا أقلّ من ذلك، يا جبّار السماوات والأرض، لا إله إلّا أنت لا إله إلّا الله الحليم الكريم، لا إله إلّا الله الرحمن الرحيم، لا إله إلّا الله ربّ السماوات والأرض وربّ العرش العظيم، اللهمَّ إنّي أنزلت بك حاجاتي كلّها فأنت العالم بي وبحالي، فيسّر أموري»
.
.
.
قربت منها  :  خيرك... شن في؟

تلفتت على صوت حماتها  :  ااها... لا مافيش نبي هذا يمشي بس

واقف عند باب القسم وايديه في جيوب سرواله... حرك اعيونه مع عوض ايشوفله من تحت لفوق لعند فات و طلع مع باب القسم... تنهد ورجع بعيونه لاخته وزوجة خوه

رشفت خشمها وتحركت  :  تعالي

مشت عروبة مع احلام.. والاخيرة وين وصلت في غزالة  وقفت وتكلمت  :  السلام عليكم... شن اخبار غفوري

عقدت حواجبها وتشوفلها تحاول تتعرف عليها  :  وعليكم السلام... من أنتي

رفعت خمارها  : أنا أحلام... شن وضع غفار... شن قال الدكتور عن حاله

تبدلت ملامحها وهي ترد  :  ربي يكون في عونه... وضعه صعب

نزلت دمعتها  ومسكت ايديها في بعض بخوف  :  طيحته واعرة..  من وين طاح

عقدت حواجبها مش فاهمة   :  طاح على راسه... خشت فيه حديدة

غمضت اعيونها بقوة وعصرت يدها وحست بدوخة بسيطة بس قادرة اتشد روحها... تتكلم ودموعها تنزل   :  من وين طاح... وكيف طاح يانعليا

غزالة هنا فهمت أن أحلام ماتعرفش باللي صار  تكلمت بصوت فيه شوي حدة  :  من قالك أنه طايح... نحنا انفجرت فينا بمبة غاز.. طربقت في حوشنا حرقت أمي وجازية والعويل وغفار حالته خطيرة

توسعت اعيونها بصدمة  :  بمبة غاز!!  أمتى صار الكلام هذا وخوتي شن صار فيهم.. وينهم حي عليا

عروبة نزلوا دموعها وشافت باتجاه  جمال... والاخير واقف من بعيد ويشوفلهم

لفت وجهها بأنزعاج  :  خوتك لوطى مع بوك وخوك

قربت منها  :  باتي وخالد هنا... وينهم.. وين قاعدين

غزالة  :  تحت مع العويل وامي

أحلام  :  شن فيهم خوتي... اكويسين ياغزالة بالله عليك

لفت ومشت  :  تعالي تحت شوفيهم بروحك

رجعت احلام بعيونها لعروبة... والاخيرة قربت منها شدت ذراعها  :  ماتخافيش باذن الله مافيش سوء