أحلام يعرب (ليبية_منقولة)

الحلقة 62

#أحلام_يعرُب ((بين الحب والحرب))
#الحلقة_62 ((الفصل الواحد والثلاثون ليالي السُهاد))
((دراما واقعية مقتبسة من أحداث حقيقية))
.
.
.
لايك قبل تقري ♥
.
.
.
«اللهم ألطف بنا حيثما الأقدار دارت، ويسر لنا الخير إذا ما النفس احتارت وأنر بالإيمان دربنا أينما الأقدام سارت وأشدد أزرنا إذا ما القوة منا خارت، وأعطنا كتابنا بأيماننا إذا الصحف طارت يا من بنورك أشرقت الأرض والكواكب سارت، اللهم اجعلنا من اهل النفوس الطاهرة والقلوب الشاكرة»
.
.
.
تكلمت بأمتعاض  :  تافه خزي... لانه صايع وخاين ومايملا عينه غير التراب يحساب الناس كلها زيه

موافقة على كلام صاحبتها  :  فعلاً والله فكرت فيها.. من كثر مايلبز ويدير في حاجات ويخون فيها يحساب حتى هيا بدير زيه.. هذا عندك معادش عنده ثقة لا في روحه ولا في الناس

يقين  :  المهم هلها شن داروا معاه.. إن شالله غير مسحوا كبدي  فيه

أحلام  :  تعرفي ماحبيتش نسأل يعرب عن شي.. حسيته معصب ومايبيش يحكي عن شي... لكن على حسب مافهمت من هناء انهم دقوه طريحة سمحة وسلموه لشرطة

رفعت حواجبها  :  يستاهل... إن شالله يتأدب بعد هذا كله

أحلام  :  والله مانضني  .... اللي فيه طبع مايتغير... لكن ربي يهديه وخلاص

يقين  :  صدقتي. اللي زيه حتى مية طريحة ماتغير فيه شي... تذكري كيف كان ساكنلي ومجنني وقريب كرهني في الجامعة من كثر ما كان يزعم في كبدي... اسملا على مراته كيف كانت متحملته بس

رفعت اكتافها  :  عروبة اتجنن وبنت عاقلة وطيوبة... وكانت اتشوف فيه استاذ ومتعلم.. واكيد هوا كان يدير في كل شي باش يبان في اعيونها انه شاب مافيش زيه.. وبعدين المسكينة مازلت دوبها كيف تزوجاته وبداية اتعرف عليه من قريب

حطت يدها على خدها تفكر  :  غريبة كيف مرت فترة الخطوبة من غير ماتكتشف طبعه الزفت

أحلام  :  كانت تحكي معاه على التليفون وبس... عروبة زمان قالتلي يعرب كان مانعها تتلاقى معاه او يجيهم  وكانت اتشوف فيه من بعيد وبس لما تمشي لمدرسة

مطت فمها  :  صدق في وجهه البارد

أحلام تنهدت وسكتت... وقعدت اتشوف لطلاب وهم يتحركوا قدامها وسارحة

تلفتت عليها وشافتلها  :  خطرها يعرب... شن اخباركم.. مازال نفس الوضع والا في تتطورات

هزت راسها وهي تشوف لبعيد  :  مافيش جديد.. مازال قالب وجهه عليا ومافيش كثرة كلام بينا... اصلاً من تروحيتنا من الاستراحة وهوا يجري على قصة عروبة ومايقعدش بكل

يقين  :  ياخية الراجل مريض ومازال يجر في كراعه جر المسكين خلوه يتريح اشوي

تنهدت بتعب  :  والله كل مانشوفه ينقز عليه يوجع قلبي وخاطري انقوله تريح وارقد وخليك لعند تبرأ بس.. لكن يعرب الموضوع هذا يتحسس منه وخايفة يفهمني غلط.. مانبيش انحسسه بالعجز ويعصب عليا اكثر من هكي