Shade of Love (Buenaventura Series #4 Ineryss' Version)

Chapter 29

Tsismis

"Bakit di kayo lumuwas ng pamilya niyo sa syudad? Magbakasyon muna kayo roon total Summer naman. Maraming magagandang pasyalan sa syudad..." mungkahi ni Ate Rici nang magawi ito sa aming bahay.

May dala na naman itong mga chocolates at ako palagi ang nakikinabang. Ilang araw narin kasing pumupunta si Ate Rici rito.

"Di namin afford ang ganoon, Ate..." Marahan pa akong natawa at sinipat ng tingin ang suot niyang may mamahaling brand. Parang katulad noong bigay niya sa aking Chanel daw.

"Huh? Kung may 5K ka pwede kanang gumala sa syudad, Trace... Wait." Kinuha niya ang kanyang slingbag na dala na ikinalaki agad ng aking mga mata.

Nilingon ko pa si Kuya na nagluluto at napalingon narin dito sa amin.

"Bibigyan kita ng pera-"

"Riss." Tawag sa kanya ni Kuya na ikinakurap naman agad ni Ate Rici.

"5K lang naman Bram. Mabubulok si Tracey rito sa bahay niyo eh summer naman," paliwanag niya.

"Okay lang po. Sanay narin ako eh... 'tsaka hindi po ako mahilig sa ganoon... Mas gusto ko ring sa bahay lang," sagot ko.

"Huh? Bakit naman? May pagka introvert ka pala talaga 'no?"

Ngumiti ako ng tipid kay Ate Rici. Sa t'wing nandito siya minsan ay nagkukulong nalang ako sa kuwarto para mabigyan sila ng privacy. O di kaya ay nasa likod ako ng bahay para magdilig ng mga bulaklak doon.

Palagi silang masaya pag magkasama sila. Nababasa ko pa naman sa libro na pag bago pa ay sobrang saya raw talaga ng ganoon. Para ka raw dinuduyan sa ere... Pero pag tumagal na ay bigla ka nalang ihuhulog sa lupa at masasaktan kana ng husto.

"Kumusta na ang higad mong kapatid, Trace?" tanong ni Mama sa akin noong pumunta ulit ako sa bayan para tulungan siya.

Ayun Ma... Kumati lalo.

Iyon sana ang isasagot ko pero iniba ko nalang.

"Masaya naman si Kuya Higad, Ma..." pagbibiro ko narin.

"Nako! Ang sarap rin talagang latiguhin ni Bram! Kung hindi lang talaga ako nakakapagtimpi diyan sa lalakeng iyan..." Gigil na gigil si Mama at makikita mo iyon sa mga ngipin niyang pinagdidiinan niya.

Iyon ang palagi naming topic tuwing magkasama kami. Pinagt-tsismisan namin si Kuya.

"Ayaw mo talaga kay Ate Rici, Mama? Mabait naman iyon at mahal na mahal rin si Kuya..." Nililingon ko ito paminsan minsan habang hinahawak hawakan ko iyong bouquet na tulips.

"Ang akin lang... Wala pang napapatunayan si Bram. Dapat ako sa kanya nagtapos muna siya at naghanap ng magandang trabaho saka niya nilalandi iyang si Rici! Kaso ang higad nagmamadali at kinakati na ata!"

Ngumuso ako para pigilan ang aking tawa.

"Saan nagmana si Kuya, Mama?"

"Syempre sa-" Naiwang nakaawang ang kanyang bibig sa ere at mukhang may napagtanto.

Dahan dahan siyang napatingin sa akin sa kalmadong ekspresyon.

"Naging higad nga rin pala ako noong kabataan ko." Tumawa si Mama at nailing.

"Kay Papa po ba iyan, Ma?!" Lumiwanag na ang aking mukha at gustong makarinig ng kwento sa kanya tungkol kay Papa.

Umirap naman si Mama sa akin at nagawa pang ilagay ang iilang hibla ng kanyang buhok sa kanyang tenga.

"Noong nasa edad mo ako Trace... Maniwala ka man o hindi... Maraming nagkakagusto sa akin. Iyong iba ay mga mayayaman pa! At noong napadpad ako sa syudad para magtrabaho... Ayun... Imbes na igapang ang sarili sa kahirapan... Ako itong ginapangan ng kalandian." Nailing pa si Mama at natampal ang noo.