The True Conqueror [Complete]

Chapter 9

Unicode

နောက်တစ်ရက်တွင်တော့ ယန်နိုင်ငံ၏ အမတ်ကြီးကို ခေါ်ပြီး မြောက်ပိုင်းစစ်တပ် ပြန်ဆုတ်သွားပြီ ဖြစ်သည်။ ပိုင်အိမ်တော်ကို ဘုရင်ကြီးလီက မြောက်ပိုင်း၏သစ္စာဖောက်အဖြစ်ကြောငြာပြီး အလံကိုင်အိမ်တော်အဖြစ်မသတ်မှတ်တော့ပေ။ ပိုင်အိမ်တော်မှာ လော့တံတားကို အပိုင်စီးထားနိုင်ဆဲ ဖြစ်သော်လည်း ကျောထောက်နောက်ခံပေးမည့် နိုင်ငံမရှိတော့ပါ။

လက်တစ်ကမ်းအလိုက စစ်ပွဲကို တားဆိီးနိုင်ပြီ ဖြစ်သောကြောင့် တောင်ပိုင်းနှင့်မြောက်ပိုင်းကို ကူးသန်းရောင်းဝယ်ကြသော ကုန်သည်တို့မှာ ယခုမှ ယခင်လို သွားလာ လှုပ်ရှားနိုင်တော့သည်။

လော့တံတားပေါ်တွင် မြင်းခြောက်ကောင်ဆွဲသည့် ကြီးမားသော ရထားလုံးကြီးသည် မြောက်ပိုင်းရေခဲလွင်ပြင်ကို ဦးတည်မောင်းသွားနေသည်။ ရထားလုံးကို မောင်းနှင်လာသူမှာ ဆံပင်မြှောက်စည်းထားသည့် ဆယ်ကျော်သက်ကောင်လေး တစ်ယောက်ဖြစ်လေသည်။ သူတို့၏ ရထားလုံးမှာ ဟိုဘက်ကမ်း သည်ဘက်ကမ်း ကူးသန်းနေကြသော ကုန်သည်တွေကြား ရောနှောလျက်ရှိလေသည်။

ရထားလုံးအတွင်း၌ လူတစ်ယောက်မက အိပ်နိုင်သော အကျယ်အဝန်းရှိလေသည်။ အထဲတွင် သားမွေးဖြင့် ပြုလုပ်ထားသည့် ဖြူစွတ်နေသော အခင်းကြီးခင်းထားသည်။ ထိုအခင်းပေါ်တွင် အလွန်ချောမောခန့်ညားသည့် လူငယ်လေး တစ်ယောက်လဲလျောင်းနေသည်။ လူငယ်လေး၏ဘေးတွင် သူ့ထက်အသက်အနည်းငယ်ကြီးပုံရသည့် နတ်ဘုရားတစ်ပါးလို အရှိန်အဝါရှိသည့် ခန့်ညားသော လူတစ်ယောက်ရှိနေသည်။ ထိုသူက လူငယ်လေးကို ဂရုတစိုက် စောင်အထပ်ထပ်ခြုံပေးနေလေသည်။

ရထားလုံးကို မောင်းနှင်လာသောကောင်လေးမှာ ရှောင်ချိုဖြစ်ပြီး ရထားလုံးအတွင်းတွင်ရှိနေသည်က လီချန်းယုံနှင့် လင်းမိုတို့ဖြစ်သည်။ လီချန်းယုံသည် ရှောင်ချို၏ သွေးအစွမ်းကြောင့် အခြေအနေတိုးတက်လာသော်လည်း ယခုထိ သတိမရသေးပါ။

နှစ်ရက်ခန့်အကြာ မနားမနေ ခရီးနှင်ပြီးနောက်မှာတော့ ရှောင်ချိုပြောသော လိုဏ်ဂူသို့ရောက်လာချေပြီ။ လိုဏ်ဂူမှာ အပြင်ဘက်က ရေခဲများဖုံးလွှမ်းနေသော်လည်း အတွင်းဘက်၌မူကား အနွေးဓာတ်အနည်းငယ်ရှိပေသည်။ အတော်အတန်ကျယ်ပြီး အတွင်းပိုင်းမှာ လူနေသလို ဖွဲ့စည်းထားလေသည်။ခုတင်ပုံစံ ကျောက်ပြားတစ်ချပ် ကျောက်သားစားပွဲတစ်ခုလည်း ရှိလေသည်။ လင်းမိုက ပတ်ဝန်းကျင်ကို စူးစမ်းကြည့်နေသောကြောင့် ရှောင်ချိုက ရှင်းပြလေသည်။