The True Conqueror [Complete]

Chapter 62

Unicode

လီချန်းယုံမှာ ဟန်မဆောင်နိုင်အောင်ပင် ဂနာမငြိမ်ဖြစ်နေရသည်။ သူသည် ဥယျာဥ်တော်အတွင်း ခေါက်တုံ့ခေါက်ပြန်လမ်းလျှောက်ကာ မိုးပေါ်သို့ မော့ကြည့်နေသည်။

သခင်လေး၏ ထို အမူအရာကို ကြည့်ရင်း ရှောင်ချိုတစ်ယောက် အတွေးဝင်လာသည်က -

သခင်လေးသာ ငှက်ဆိုလျှင် ကောင်းကင်သို့ ပျံတက်သွားမည်လားမပြောတတ်။ သို့သော် ထိုအရာက နည်းနည်း မဖြစ်နိုင်ပါ။ အရှင်လင်းမို မည်သည့်နေရာတွင် ရှိနေသည်မှန်း သခင်လေး မသိချေ။

ရှောင်ချို တစ်ယောက်တည်း အတွေးလွန်နေစဥ် လီချန်းယုံက သုတ်သီးသုတ်ပျာဖြင့် ဥယျာဥ်တော်က ထွက်သွားရန် ခြေလှမ်းတို့ ပြင်နေသည်။
"သခင်လေး...ဘယ်သွားမလို့လဲ''

လီချန်းယုံက ရှောင်ချိုကို လှည့်ကြည့်ပြီး စိတ်မရှည်စွာ ပြန်ဖြေသည်။
"ငါသွားစောင့်မလို့လေ...''

ရှောင်ချို မျက်မှောင်ကြုတ်သွားသည်။
"အရှင်လင်းမိုကိုလား၊ ဘယ်မှာသွားစောင့်မလို့လဲ''

လီချန်းယုံက တိုက်ပွဲတွင်းက တည်ဆောက်ထားခဲ့သော မျှော်စင်ကြီးဆီသို့ လက်ညှိုးထိုးပြရင်း ပြန်ဖြေသည်။
"အဲ့ဒီမှာ...အဲ့ဒီကဆို နည်းနည်းပိုနီးသွားမလားလို့''

ရှောင်ချိုမှာ စိတ်မကောင်းဖြစ်သွားသည်။ကောင်းကင်ပြင်မှ နဂါးကို စီးနင်းလာမည့်သူအတွက် မြေပြင်နှင့် ထိုမျှော်စင်သည် များစွာ ကွာခြားမည်မဟုတ်ချေ။ သို့သော် ထိုသည်ကိုမှ သခင်လေးက မျှော်စင်ပေါ်က ရပ်စောင့်ရန် ဆန္ဒရှိနေသည်။

ရှောင်ချို ခေါင်းညိတ်ပြလိုက်သည်။ လီချန်းယုံလှည့်ထွက်သွားသည်နှင့် သူပါ နောက်က လိုက်လာခဲ့သည်။

မျှော်စင်ကြီးမှာ တိုက်ပွဲတွင်းက ထိခိုက်မှုများကြောင့် သစ်သားလှေကားထစ်တို့ ကျိုးပဲ့ကုန်ပြီဖြစ်သည်။ ပျက်စီးသွားသော နန်းတော်အဆောင်တို့ကို ပြင်ဆင်ခဲ့သော်လည်း အသုံးမဝင်တော့သော မျှော်စင်ကြီးကို မည်သူမျှ မပြုပြင်ခဲ့ပေ။

လီချန်းယုံက ကျိုးပဲ့နေသော လှေကားထစ်တို့ကို အလောတကြီးနင်း ပြီး တက်နေသောကြောင့် ရှောင်ချိုက သတိလှမ်းပေးရသည်။