The True Conqueror [Complete]

Chapter 33

(Really sorry for late update...)

လင်းမိုသည် လီချန်းယုံ၏ တာဝန်များကို ခေတ္တတဖြုတ် ဝင်ရောက်ကူညီသည့်နေ့က အကြောင်းအရာ အလုံးစုံသည် ဘုရင်ကြီးလီ၏ နားသို့ရောက်သွားလေသည်။ ဘုရင်ကြီးလီသည် ကျန်းမာရေးချို့တဲ့မှုကြောင့် နန်းဆောင်အပြင်သို့ ထွက်လေ့မရှိဘဲ နိုင်ငံ့တာဝန်ကို အိမ်ရှေ့စံ၏ လက်ထဲသို့ ဝကွက်အပ်ထားခြင်း ဖြစ်သည်။

သူသည် အမိမဲ့သားလေး လီချန်းယုံကို ဖခင်တစ်ယောက်၏ မေတ္တာအပြည့်အဝပေးကာ စောင့်ရှောက်ခဲ့သူဖြစ်သည်။
သားတော်အပေါ် မျှော်လင့်ချက်ကြီးစွာထားသော ဖခင်တစ်ယောက်အနေဖြင့် ကြားရသော သတင်းမှာ စိတ်ကျေနပ်စရာ မရှိပေ။ သားတော်၏ စိတ်ဓာတ်ပြတ်သားမှုကို သိသော ဖခင်တစ်ယောက်အနေဖြင့် အချိန်မနှောင်းခင် မဖြစ်သင့်သည်ကို မဖြစ်အောင်တားမြစ်ရပေမည်။

ဘုရင်ကြီးလီသည် ဤကိစ္စကို စိတ်လက်မာန်ပါဖြေရှင်းခြင်းထက် ပညာသားပါပါ ဖြေရှင်းခြင်းက ပို၍သင့်တော်မည်ဖြစ်ကြောင်း နားလည်ထားလေသည်။ သို့ကြောင့်လည်း ကြိုတင်၍ အစီအမံတစ်ခုပြုလုပ်ထားရန် ဆုံးဖြတ်လိုက်သည်။

အိမ်ရှေ့စံ၏ နန်းဆောင်တွင် လင်းမိုနှင့် လီချန်းယုံအတူရှိနေစဉ် အထိန်းတော်တစ်ယောက်က ဘုရင်ကြီးလီသည် တောင်ပိုင်းဘုရင် လင်းမိုကို နေ့လယ်စာ အတူသုံးဆောင်ရန် ဖိတ်ကြားကြောင်း လာရောက်လျှောက်တင်လေသည်။

"ခမည်းတော်က လင်းမိုတစ်ယောက်ပဲဖိတ်တာလား''

"မှန်လှပါ အရှင်. . . ဘုရင်ကြီးလီက တောင်ပိုင်းဘုရင် အရှင်လင်းမို တစ်ယောက်တည်းကိုပဲ ဖိတ်ကြားတာပါ''
အထိန်းတော်က ဘုရင်ကြီးလီ၏ အမိန့်အတိုင်း ပြန်လည်လျှောက်တင်လိုက်သည်။

"ရတယ် ချန်းယုံ၊ ငါသွားလိုက်မယ်၊ ကိစ္စထွေးထွေထူးထူးမရှိလောက်ပါဘူး''

လင်းမိုက လီချန်းယုံကို ကြည့်ပြီး နှစ်သိမ့်စကားဆိုလိုက်သည်။ အမှန်တကယ်တော့ လီချန်းယုံသည် လင်းမိုကို ဘုရင်ကြီးလီခေါ်ဆိုရသည့် အကြောင်းရင်းကို မသိသော်လည်း အနည်းငယ်တော့ စိုးရိမ်မိသည်။