The True Conqueror [Complete]

Chapter 48

Unicode

ညတစ်ညကုန်လွန်ပြီးနောက် မိုးလင်းလာသောအခါ လီချန်းယုံ သစ်ပင်ပေါ်က ဆင်းလာခဲ့သည်။ သူအမဲလိုက်ခရီးကို စတင်ရပေဦးမည်။ မိုင်နှစ်ရာခန့်ကျယ်ဝန်းသောတောတွင် ယခုလိုသာ လျှောက်သွားနေပါက ကျားဖြင့်မတွေ့ခင် အန္တာရာယ်အမျိုးမျိူးတို့ဖြင့်ရင်ဆိုင်ရကာ သူဒုက္ခရောက်သွားနိုင်သည်။

လီချန်းယုံက သူရောက်ရှိနေသော နေရာ၏ မြေအနေအထားကို အကဲခတ်သည်။ နီညိုရောင်ဖြင့် အနည်းငယ်ပျော့နေသော မြေသားတို့က အောက်ဘက်တွင် ရေအရင်းအမြစ်တစ်ခုခုရှိကြောင်း ညွှန်ပြနေသည်။ စိမ်းလန်းနေသော အကြီးဆုံး ကျွန်းသစ်ပင်ကြီးတို့၏ အမြစ်တို့ကို အနည်းငယ်တူးကြည့်ရာ အမြစ်တို့မှာ အနောက်ဘက်သို့ ဦးတည်ပြီး ယှက်နွှယ်နေကြလေသည်။

သစ်ကိုင်းတို့သည် နေရောင်ခြည်ရသည့်ဘက်ကို ကွေးညွှတတ်ပြီး သစ်ပင်အမြစ်တို့သည် ရေရသည့်ဘက်သို့ ဦးတည်ကာ ကုပ်တွယ်ထားတတ်ကြသည်။ ရေအရင်းအမြစ်ရှိသည့်နေရာကို ရှာရသည့်အကြောင်းရင်းမှာ မိုင်နှစ်ရာကျယ်သော ဤတောတွင် ဟန်ယန်းကျားသည် သေချာပေါက် ရေရှိရာသို့ ရောက်လာလိမ့်မည်ဟု တွက်ဆမိသောကြောင့် ဖြစ်သည်။

လီချန်းယုံ၏ တွက်ဆချက်မမှားပါ မိုင်ဝက်ခန့်လမ်းလျှောက်ပြီးချိန်မှာတော့ သူသည် စမ်းရေကျသံ ကိုကြားလိုက်ရသည်။ အတွင်းအားနှင့် သိုင်းပညာကို အသုံးမပြုရသော်လည်း စွဲမြဲစွာလေ့ကျင့်ခဲ့မှုကြောင့် လီချန်းယုံ၏ အမြင်အာရုံနှင့်အကြားစွမ်းရည်မှာ သာမန်ထက်ထူးကဲလေသည်။

စမ်းချောင်းနားသို့ နီးကပ်လာသည်နှင့်အမျှ ရေဓာတ်ဖြည့်တင်းရန် လာကြသော သတ္တဝါငယ်လေးများကိုလည်း တွေ့ရလေသည်။ ရေဆင်းသောက်သော တောဆင်းရိုင်းအုပ်ကြောင့် သူသည် မြက်ရိုင်းရှည်ကြီးများတွင် ပုန်းကွယ်လိုက်ရသေးသည်။ ကံကောင်းသည်က လေက အထက်ဘက်က တိုက်ခတ်နေသောကြောင့် တောဆင်းရိုင်းအုပ်မှာ လူသား၏ အနံ့ကို မရလိုက်ပေ။

သို့သော် ကံကောင်းမှုမှာ တာရှည်မခံပေ။ ထိုတောဆင်ရိုင်းအုပ်မှာ ဆင်ပေါက်လေးက လီချန်းယုံ ပုန်းကွယ်နေသည့် မြက်ရိုင်းရှည်ကြီးများအနီးသို့ ကပ်လာသည်။ ဆင်ပေါက်လေးက ကပ်လာသည့်နှင့်အမျှ မသင်္ကာအနံ့ကို ခံမိဟန်တူသည်။ ဆင်ပေါက်လေးမှာ အစွယ်နှစ်ချောင်းပါသော စွယ်စုံဆင်ဖြစ်သည်။ အရွယ်ရောက်လာပါက ခွန်အားကြီးပြီး ဆင်အုပ်ကို ဦးစီးနိုင်မည့် အနေအထားတွင် ရှိသည်။