The True Conqueror [Complete]

Chapter 66

Unicode

မနက်မိုးလင်းပြီး အဆောင်တော်၏ ပြတင်းတံခါးမှ နေရောင်ခြည်အလင်းတန်း တိုးဝင်လာသည်အထိ လီချန်းယုံ အိပ်ယာမနိုးသေးပါ။

ထုံးစံအတိုင်း လင်းမိုပင် ညီလာခံပြီး၍ ပြန်လာပြီ ဖြစ်သည်။ လင်းမိုက မနေ့က လီချန်းယုံကို ဆူပူသော်လည်း လီချန်းယုံဝယ်သူလာသည့် သေရည်အိုးများကိုကား သူ၏ အိပ်ယာဘေး၌ အစီအရီထောင်ထားပေးသည်။

စားပွဲပေါ်၌ကား မနက်စာကို အသင့်ပြင်ထားသည်။ လင်းမိုသည် အမြဲတစေ လီချန်းယုံနှင့်အတူ မနက်စာစားလေ့ရှိသောကြောင့် လီချန်းယုံ မနိုးသေးသ၍ သူလည်းမစားပါ။ အကယ်၍ လီချန်းယုံနိုး၍ လင်းမိုမနိုးပါက လင်းမိုသေချာပေါက် မနက်စာကို တစ်ယောက်တည်းစားရမည်ဖြစ်သည်။

သေရည်အိုးများကို မြင်၍ အတွေးတစ်ခုဝင်လာကာ လင်းမိုသည် သူအဆောင်တော်က အရွယ်အစားမျိုးစုံရှိသည့် ရတနာသေတ္တာများဆီသို့ ဦးတည်သွားလိုက်သည်။ ထိုအထဲတွင် ကျောက်မျက်ရတနာမျိုးစုံရှိလေသည်။

ခပ်ကြီးကြီးသေတ္တာထဲတွင် တော်ဝင်တံဆိပ်ခတ်နှိပ်ထားသည့် ရွှေတုံးရွှေစများ ရှိလေသည်။ သူကအကြောင်းပြချက်မရှိ။ သည်အတိုင်း ဖွင့်ကြည့်ခြင်း ဖြစ်သော်လည်း ယခုမှ အိပ်ယာနိုးလာသော လီချန်းယုံ၏ စိတ်ထဲတွင် တစ်မျိုးတစ်မည် အထင်ရှိသွားလေသည်။

မည်သို့ပင်ဆိုစေ သူက လင်းမိုမသိအောင် ယူလာခြင်း ဖြစ်ရာ အနည်းငယ် အပြစ်ရှိသလို ခံစားရသည်။

"အဟမ်း...''

လင်းမိုလှည့်ကြည့်လိုက်ရာ အိပ်ယာနိုး၍ ထိုင်နေသော လီချန်းယုံကို တွေ့လိုက်ရသည်။

လင်းမိုက မနက်ခင်းတိုင်း အချိုသာဆုံးအပြုံးတို့ဖြင့် နှုတ်ဆက်ရသည်မှာ သူ၏ ဝတ္တရားဖြစ်သည့်အလား ပြုံးပြသည်။
"အားယုံလေးနိူးပြီလား''

"အင်း...ဘာလုပ်နေတာလဲ''
လီချန်းယုံက မျက်မှောင်ကြုတ်ပြီး မေးသည်။

လင်းမို၏ မျက်နှာတွင် အဓိပ္ပါယ်ဖော်ရခက်သော အပြုံးတစ်ခူ ဖြတ်ပြေးသွားသည်။
"ကြည့်ရတာ ကိုယ်တော် နန်းဆောင်လုံခြုံရေးကို မြှင့်တင်ရတော့မယ် ထင်တယ်''