The True Conqueror [Complete]

Chapter 49

Unicode

လီချန်းယုံမနက်ဝေလီဝေလင်းတွင် ကြားလိုက်ရသော ငှက်ကလေးများ၏ အော်သံကြောင့် သူနိုးလာလေသည်။ သူနိုးနိုးချင်း ပတ်ဝန်းကျင်ကို အကဲခတ်လိုက်သည်။ တောအုပ်မှာ ပိတ်ပိတ်ထူနေသောကြောင့် နေပြောက်မထိုးနိုင်။ ပတ်ဝန်းကျင်ကို ရှင်းလင်းစွာ မမြင်ရသေးပေ။ သူအိပ်ယာက ဆတ်ခနဲထပြီး မပြီးဆုံးသေးသော တာဝန်ကို လုပ်ဆောင်ရန် ဟန်ပြင်လိုက်သည်။

ဟန်ယန်ကျားတိုးဝင်ပျောက်ကွယ်သွားသော စမ်းချောင်းဘေးမှ သစ်ပင်တို့ကို ကြည့်ကာ လီချန်းယုံသည် အမဲလိုက်ခရီး စတင်ခဲ့ချေသည်။ သစ်တောတွင်းက မြေတို့်မှာ အနည်းငယ်ပျော့နေသောကြောင့် ကျားခြေရာတို့ကို မထင်မရှားတွေ့နိုင်ပေသည်။

ကျွမ်းကျင်သောမုဆိုးကောင်းတို့၏ အရည်အသွေးတွင် သားကောင်၏ ခြေရာကို ကောင်းစွာကောက်ယူနိုင်ခြင်းသည်လည်း အပါအဝင်ဖြစ်ချေသည်။

လီချန်းယုံက တစ်စတစ်စနက်ရှိုင်းလာသော တောကို ပိုမိုသတိကြီးစွာ ကျော်ဖြတ်နေရသည်။ လမ်းတစ်လျှောက်တွင် လူတစ်ရပ်မြုပ်သွားနိုင်သော နွံများ၊ အသက်ဝင်လှုပ်ရှားနေသည့် နွယ်ပင်များ၊ အဆိပ်ပြင်းမြွေများမရေမတွက်နိုင်အောင် တွေ့ခဲ့ရလေသည်။

လီချန်းယုံသာ သတိရှိမနေပါက သူ၏ အသက်နှင့်အိုးစာ ကွဲသွားနိုင်သည်။  သူက မြေပြင်က မထင်မရှားကျားခြေရာများနောက်သို့ လိုက်ရင်း ကျားနှင့် တဖြည်းဖြည်းနီးလာမှန်းသိလိုက်ရချေသည်။

"ဝေါင်း...''
သူ့နားထဲတွင် ကျားဟိန်းသံ အကျယ်ကြီးကိုကြားလိုက်ရချေသည်။ သားကောင်တို့၏ အသံကို ခွဲခြားနိူင်ရန် လေ့ကျင့်ထားသည့် လီချန်းယုံသည် ထိုကျားဟိန်းသံမှာ တစ်စုံတစ်ရာကြောင့် နာကျင်သွားသည့် ဒေါသဖြင့် ဟိန်းသံ ဖြစ်ကြောင်းသိလိုက်သည်။

လီချန်းယုံက သူ၏ ခြေလှမ်းတို့ကို အရှိန်တင်ပြီး ကျားဟိန်းသံကြားရသော နေရာသို့ဦးတည်သွားလိုက်သည်။ သို့သော် တော်တော်နှင့်မရောက်နိုင်။

တောအုပ်အတွင်း ဖြစ်သောကြောင့် အသံတို့က ပဲ့တင်ကာ ရိုက်ခတ်နေခြင်းဖြစ်သည်။ သို့ကြောင့် လီချန်းယုံသည် သူ၏ နားထဲတွင် ကျားဟိန်းသံကို အကျယ်ကြီး ကြားလိုက်ရခြင်း ဖြစ်သည်။