The True Conqueror [Complete]

Chapter 45

Unicode

လင်းမို နိုးလာသောအခါ မနက်မိုးသောက်ချိန်ရောက်နေပြီမှန်း သိလိုက်ရသည်။ သူ၏ ဘေးတွင်ရှိသော လီချန်းယုံမှာ အိပ်မောကျနေဆဲပင်ဖြစ်သည်။ တောင်ပိုင်းရာသီဥတုမှာ ဝံပုလွေဖြူလေးအတွက် တကယ်ပူနေဟန်တူသည်။ ဝံပုလွေဖြူလေး၏ ကျော့ရှင်းသောလည်တိုင်တွင် ချွေးစက်တို့ ရှိနေသည်။

လင်းမိုက လီချန်းယုံ၏ နဖူးပြင်တွင်ဝဲကျနေသော ဆံနွယ်တို့ကို အသာသပ်ပေးလိုက်သည်။ အအိပ်ဆတ်သော လီချန်းယုံမှာ သူ၏ မျက်နှာကို လာရိုက်ခတ်သော အထိအတွေ့ကြောင့် အနည်းငယ် လှုပ်ရှားသွားလေသည်။

လီချန်းယုံက အိပ်နေရာမှ နိုးသွားပြီး မျက်တောင်ရှည်ကြီးများကို ပုတ်ခတ်ပြီး မျက်လုံးများကိုအားယူဖွင့်လိုက်သည်။ ဝါးနေသော ပုံရိပ်တို့ထင်ရှားလာသောအခါ နံဘေးတွင် သူ့ကို မေးထောက်ကာ ကြည့်နေသော လင်းမိုကို တွေ့လိုက်ရသည်။

"နိုးပြီလား...''
လင်းမိုက သူ၏ နှုတ်ခမ်းတို့ကွေးတက်သွားအောင်ထိ ပြုံးလိုက်ပြီး နိုးထလာသော ဝံပုလွေဖြူလေးကို နှုတ်ဆက်လိုက်သည်။

လီချန်းယုံက လင်းမိုကိုတစ်ချက်ကြည့်ပြီး သူ၏ မျက်လုံးတို့ ပြန်ပိတ်သွားသည်။ သူ၏ နှုတ်ဖျားမှလည်း လေသံတိုးတိုးလေး ထွက်သွားသည်။
"နိုးသေးဘူး...''

"....''
လင်းမိုမှာ သူရှေ့တွင်ပင် မျက်စိတို့ပွင့်လာပြီး နိုးလာကာ သူမေးလိုက်မှ မျက်လုံးတို့ပိတ်သွားသော ဝံပုလွေဖြူလေးကို သဘောကျပြီးရယ်နေလေသည်။ အေးစက်စက် ရေခဲမင်းသားမှာ တစ်ခါတစ်ရံ ထိုမျှ ကလေးဆန်တတ်သည်။

"ချန်း...ယုံ...မင်းအခုမှ အိပ်ယာနိုးတာလေ။ အခုပဲ ချစ်စရာကောင်းအောင် လုပ်နေလို့ ဘယ်ဖြစ်မလဲ။ ဒီမနက် ညီလာခံ သွားစရာရှိသေးတယ်''

"သွားလေ...''
လီချန်းယုံက အရေးမစိုက်ဟန်ဖြင့် မျက်လုံးပင် မဖွင့်ပဲပြောလိုက်သည်။

လင်းမို သက်ပြင်းချပြီး သူ့၏ ခန္ဓာကိုယ်ကိုတစ်ချက်ကြည့်လိုက်သည်။ လီချန်းယုံ၏ လက်တစ်ဖက်က သူ၏ ဝမ်းဗိုက်တွင်နေရာယူထားပြီး သူ၏ ကြွက်သားအမြောင်းမြောင်းကို တို့ထိနေလေသည်။ ခြေထောက်တစ်ဖက်ကလည်း သူ့ကိုခွထားပြီး လင်းမို၏ လက်တစ်ဖက်ကို ခေါင်းအုံးထားလေသည်။