The True Conqueror [Complete]

Chapter 21

Unicode

"ချန်းယုံ''

လင်းမိုအိပ်ရာနိုးလာသောအခါ လက်ကအလိုအလျောက် သူ့ဘေးမှာ မလှုပ်မယှက်အေးအေးဆေးဆေး အိပ်တတ်သည့် ဝံပုလွေဖြူလေးကို စမ်းလိုက်သည်။ ခါတိုင်းလို နူးညံ့ပြီး နွေးထွေးသော အထိအတွေ့ကိုမရပဲ ထိုအစား အေးစက်စက် အိပ်ရာခင်း၏ အထိအတွေ့သာ ရလိုက်သည်။ လင်းမို မျက်လုံးများဖွင့်ပြီး ကြည့်လိုက်သောအခါ လီချန်းယုံကို မတွေ့ရပါ။

ချန်းယုံ ဘယ်ရောက်သွားတာလဲ

မနေ့ညနေက လင်းမို၏ အတင်းအကျပ် နမ်းရှိုက်မှုတို့ကြောင့် သူတို့နှစ်ယောက် ညနေစာပင်မစားရပါ။ ရုန်းရင်းခက်ဆန်ဖြင့်ပင် နောက်ကျသွားသောကြောင့် နှစ်ယောက်လုံး အိပ်ပျော်သွားလေသည်။ လင်းမိုက ပျင်းတိပျင်းရွဲဖြင့် ဖရိုဖရဲ ဖြစ်နေသော ဝတ်ရုံကို ပြင်ဝတ်သည်။ မနက်မိုးလင်းကစ နေရောင်ခြည်နုနု နွေးနွေးဖြာကျနေသော အခန်းထဲတွင် နတ်ဘုရားလို ချောမောသူကြီးမှာ သူ၏ ဝံပုလွေဖြူလေး အရိပ်အယောင်ကို ရှာရန် အိပ်ရာမှ ထလာလေသည်။

လင်းမို၏ စူးရှသော မျက်လုံးတို့က မနေ့က ချန်းယုံနှင့်စာရေးလေ့ကျင့်နေသော စားပွဲပေါ် အကြည့်ရောက်သွားသည်။ သူတွေ့လိုက်ရသည်က ငွေမှင်ရောင် စက္ကူလေးပေါ်မှာ မှင်နက်တို့ဖြင့် ညီညာစွာရေးထားတဲ့ စာလုံးလေးများ။မနေ့ကမှ ထိုစာလုံးလေးများကို ချန်းယုံမရေးတတ်သောကြောင့် လင်းမိုက စနောက်နေမိသေးသည်။ ယခုတော့ လင်းမို၏ လက်ရေးထက်ပင် လှပပြီး ဝိုင်းစက်နေသေးသည်။

"ငါပြန်လာခဲ့မယ်''

အနှီစာလုံးလေးများကို ကြည့်ပြီး သူ၏ ချစ်လှစွာသော ဝံပုလွေဖြူလေးမှာ ထင်သလောက် မညံ့မှန်းသိလိုက်ရသောကြောင့် လင်းမိုမှာ အနည်းငယ်ပင် ဂုဏ်ယူချင်သလိုဖြစ်သွားသည်။ သူက လီချန်းယုံ၏ အရည်အချင်းကို ယုံကြည်သော်လည်း လီချန်းယုံသည် တစ်ခါတစ်ရံ ပကတိရိုးစင်းလှသူဖြစ်သည်။ ထို့ကြောင့်လည်း လင်းမို၏ ပရိယာယ်များသောအကြံအစည်များကို လီချန်းယုံက စိုးစဉ်းမျှ မရိပ်မိခဲ့ခြင်းပေ။

ထိုသို့တွေးလိုက်မှ မနေ့က နမ်းရှိုက်ခဲ့ရသော ချယ်ရီးသီးလို နှုတ်ခမ်းဖူးဖူးလေးကို သတိရသွားသည်။ အတွေ့အထိမဆိုနှင့် ယောင်ယမ်းစွာ တွေးမိသော အတွေးများကပင် လင်းမို၏ ရင်ခုန်သံကို နှစ်ဆမြန်လာစေနိုင်အောင် ထိုနှုတ်ခမ်းရဲရဲလေးက ပြုစားနိုင်လေသည်။