The True Conqueror [Complete]

Chapter 57

ထိုရက်ပိုင်းအတွင် ယန်ပြည်နယ်တစ်ခုလုံး အုတ်အော်သောင်းနင်း ဖြစ်နေကြသည်။ ပြည်သူများအကြားတွင် အလွန်ထူးခြားသော သတင်းတစ်ခုပျံ့နှံ့နေသည်။

နတ်ဆိုးဘုရင်သည် ကပ်ဆိုးဘေးအန္တရာယ်များကို ဖန်တီးရန် လူ့လောကသို့ ရောက်လာပြီဟုပင်။

ထိုသတင်းတို့၏ ရင်းမြစ်မှာ သင်္ချိုင်း မြေအနီးသို့ ဟင်းရွက်ခူးသွားသော ကောင်လေးတစ်ယောက်ဆီက စခဲ့ခြင်း ဖြစ်သည်။

ယန်ပြည်နယ်၏ နယ်စပ် ရွာလေးတစ်ရွာ၌ ကျန်းယန် ဆိုသော ကောင်လေးတစ်ယောက်ရှိလေသည်။ မုဆိုးမ အမေကြီးကို ပြုစုစောင့်ရှောက်နေသော ထိုကလေးမှာ ညနေတိုင်း ရွာ အစပ်တွင် ဟင်းရွက်တို့သွားခူးလေ့ရှိသည်။

တစ်နေ့တွင် ကျန်းယန်သည် ရွာအစပ်က ဟင်းရွက်တို့ကို ဆိတ်များစားထားသဖြင့် သိပ်မကျန်တော့ရာ နံဘေးက သင်္ချိုင်းမြေဆီသို့ အရဲစွန့်ပြီး သွားခူးလေသည်။

သူ ဟင်းရွက်ခူးနေစဉ် သင်္ချိုင်းမြေမို့မို့ဆီက ထူးခြားသော တစ်စုံတစ်ခုကို သတိထားမိလိုက်လေသည်။ ထိုအရာကား မြေထဲမှ တိုးထွက်လာသော အရိုးစုပင်။ ထိုအရိုးစုကို တွေ့လျှင်တွေ့ချင်း ကျန်းယန်မှာ လိပ်ပြာလွင့်မတတ်ကြောက်ရွံ့ပြီး ရွာဆီသို့ ပြေးသွားလေသည်။

ထိုအချိန်မှစ၍ သတင်းစကားတို့ပျံ့နှံ့သွားခဲ့လေသည်။ နတ်ဆိုးဘုရင် လူ့လောကသို့ စတင်ကျူးကျော်မည့် အချိန်တွင် ၎င်း၏ ရှေ့ပြေးတမန်တော်များအဖြစ် သေလွန်းပြီးသောသူတို့က အသက်ဝင်သူကဲ့သို့ နိုးထလာမည်ဟု အဆိုရှိရာ လူအများကြောက်ရွံ့သွားကြလေသည်။

ရက်ပိုင်းခန့်အတွင်း အလားတူ ဖြစ်ရပ်များမှာ များသထက်များလာသည်။

လင်းမိုသည် ဆယ့်ငါးပြည်ထောင် ပြည့်ရှင်အနေဖြင့် ထိုသတင်းစကားတို့က သူ့ဆီသို့ နေ့တိုင်းရောက်လာနေသည်။ အခြေအနပ်အရပ်ရပ်ကို ထိန်းသိမ်းရန်ကြိုးပမ်းနေရခြင်းကြောင့် လင်းမိုမှာ ကတိပေးထားသည့်အတိုင်း မြောက်ပိုင်းသို့ မသွားနိုင်သေး။

သင်္ချိုင်းမြေများ၌ လင်းမို၏ အစောင့်အကြပ် စစ်သည်တော်တို့ အပြည့်နေရာယူထားကြသည်။ လင်းမို၏ သီးသန့်ကိုယ်ရံတော် တပ်ဖွဲ့မှ သိုင်းပညာရှင်တို့သည်လည်း ထန်ရွှမ်းတိုက်၏ နေရာအသီးသီး၌ အသင့်နေရာယူထားကြသည်။