ရှန့်လင်ယွမ်းသည်ကား ခေတ္တခဏကြာသောအခါမှသာလျှင် ဤနေရာသည်ကား *‘အရက်ဆိုင်’ ဟုခေါ်သော်ငြား အရက်တစ်မျိုးတည်းကိုပဲအထူးတလည်ရောင်းချနေတာမျိုးမဟုတ်ကြောင်းသဘောပေါက်နားလည်သွားလေသည်။
[T/N
*(酒)ဆိုတာက (အရက်)၊ (店) ဆိုတာက (ဆိုင်) တိုက်ရိုက်ဘာသာပြန်မယ်ဆိုရင် ‘အရက်ဆိုင်’ လို့အဓိပ္ပာယ်ရပေမယ့် တကယ်တမ်းက ‘ဟိုတယ်’ လို့ဆိုလိုတာပါ။ ရှန့်လင်ယွမ်းက (酒店)ဆိုတဲ့စကားလုံးနှစ်လုံးကို ပေါင်းစဉ်းစားလိုက်တဲ့အတွက် အရက်ဆိုင်လို့ထင်သွားတာပါ။]
သူတို့ရောက်လာချိန်မှာ ညသန်းခေါင်ယံကိုပင်အတော်လေးကျော်လွန်သွားခဲ့ပြီဖြစ်သည်။ သို့သော် သုံးချွမ်းတွင် ညမထွက်ရအမိန့်မျိုးထုတ်မထားသည့်အတွက် ဟိုတယ်ဧည့်ခန်းမဆောင်အတွင်းတွင် ခရီးပန်းလာသော ခရီးသွားဧည့်သည်တော်များဖြင့် ပျားပန်းခတ်မျှရှုပ်ယှက်ခတ်စည်ကားလို့နေမြဲပင်ဖြစ်သည်။
၎င်းမှာ ပထမဆုံးအနေဖြင့် သူ့အနားမှဖြတ်လျှောက်သွားသော အုန်းအုန်းကျွက်ကျွက်ညံအောင်စကားစမြည်ပြောဆိုနေသည့် အသက်ကြီးကြီးအမျိုးသမီးများကိုတွေ့မြင်လိုက်ရသည်။ သူတို့တစ်ဦးချင်းစီတိုင်းမှာ အသက် (၆၀) ခန့်ရှိပြီဖြစ်သည်။ သို့သော်ငြား သူတို့အားလုံး၏အပြုအမူများမှာ လုံးဝကို ‘သင့်မြတ်လျော်ကန်မှု’မရှိလှပါချေ။ အသက်ကြီးသောအမျိုးသားများသည်ကား ဘီးလုံးများပါသောသေတ္တာများကိုတွန်းရွှေ့နေကြရပြီး အနှီအမျိုးသမီးကြီးများမှာတော့ တစ်ယောက်နှင့်တစ်ယောက်ပုံစံချင်းပြိုင်နေသည့်နှယ် အရောင်အသွေးစုံလင်သောခေါင်းစည်းပုဝါများကိုဆင်မြန်းထားကြသည်။ အဝေးမှကြည့်လျှင် ၎င်းတို့မှာ အထီးနှင့်အမ ပြောင်းပြန်ဖြစ်နေသော ငှက်တစ်အုပ်နှင့်ပင်တူညီလို့နေသည်။ လက်ထဲတွင် ‘သေတ္တာ’လေးတစ်လုံးကိုကိုင်ထားသော အဒေါ်ကြီးတစ်ယောက်သည်ကား ဘေးဘယ်ညာသို့ တခဏမျှဟိုကြည့်သည်ကြည့်လုပ်နေရင်းက ခပ်လှမ်းလှမ်းတွင်ရှိနေသော လူအုပ်ကြားထဲမှသိသာထင်ရှားစွာကွဲထွက်နေသည့် ရှန့်လင်ယွမ်းကိုမြင်တွေ့သွားလေတော့သည်။ သူမ၏မျက်လုံးများက ရုတ်တရက်အရောင်လက်သွားပြီးနောက် ခြေလှမ်းကျဲကြီးများဖြင့် သူ့ထံသို့တရှိန်ထိုးလျှောက်လှမ်းလို့လာသည်။
