ရှောင်းကျန်းက သူ့မျက်လုံးများကိုမှေးကျဉ်းလိုက်သည်။
"ဘာအဓိပ္ပာယ်လဲ?"
"မင်းကြည့်လေ...ပထမဆုံးပူဆွေးယဇ်ပူဇော်ပွဲကို ချိယွမ်းမှာပြုလုပ်ဖို့ကိုရွေးချယ်ခဲ့တယ်၊ အားလုံးက ပိချွင်းရှန်းလုပ်ခဲ့တာပဲ။ ဒါပေမဲ့ ကိစ္စတွေပြီးသွားတော့ ပိချွင်းရှန်းဘာဖြစ်သွားသလဲဆိုတာကို ဘယ်သူမှဂရုမစိုက်ကြတော့ဘူး။ အားလုံးရဲ့အာရုံက တံလျှပ်လိပ်ပြာအရှုပ်တော်ပုံတွေဆီကို ရောက်သွားကြတယ်၊ သူ့ရဲ့နောက်ဆုံးသားကောင်ကလည်း တိုက်တိုက်ဆိုင်ဆိုင်ပဲ သုံးချွမ်းပူဆွေးယဇ်ပူဇော်ပွဲပြဿနာရဲ့ အဓိကလက်သည်တရားခံတွေထဲက တစ်ယောက်ဖြစ်နေပြန်တယ်၊ အဲဒါက နည်းနည်းလေး ထူးတော့ထူးဆန်းနေတယ်__မုတ်ဆိတ်နဲ့လူနဲ့ သူဒုက္ခပေးခဲ့တဲ့ ဟိုကောင်လေးတို့နှစ်ယောက်က ငါတို့ရဲ့စုံစမ်းစစ်ဆေးမှုတွေကို ကြားဖြတ်နှောင့်ယှက်လိုက်ကြတာပဲ။ အထူးသဖြင့် မုတ်ဆိတ်နဲ့လူပေါ့၊ သူက ပိချွင်းရှန်းကိုကာကွယ်ဖို့အတွက် သူ့အသက်ကိုသူစတေးခံဖို့တောင်အဆင်သင့်ဖြစ်နေခဲ့တာ။ အဲဒီကိစ္စတွေကြောင့် ငါတို့လည်း သုံးချွမ်းကိုရောက်လာကြပြီး ယွဲ့သယ်ဘိုးဘိုးတို့ရဲ့ ကလိမ်ကကျစ်လုပ်ရပ်တွေကိုဖော်ထုတ်နိုင်သွားတာပဲ။ မဟုတ်လို့ကတော့ တံလျှပ်လိပ်ပြာကူးစက်ခံရတဲ့လူတွေကလည်း ရောဂါလက္ခဏာသိသိသာသာမပြတဲ့အပြင် နတ်ဆရာဂူသင်္ချိုင်းကလည်း မြေအောက်ထဲမှာနစ်မြုပ်နေတာဆိုတော့....အားလော့ကျင်းတစ်ယောက် ဝုန်းခနဲထွက်လာရင်တောင် သူဘယ်သူလဲဆိုတာကို ဘယ်သူမှသိကြမှာမဟုတ်ဘူး၊ သူ့ရဲ့အသိုက်ကိုလည်း ဘယ်သူကရှာတွေ့မှာတဲ့လဲ? ဒီဖြစ်ရပ်နှစ်ခုနဲ့ပတ်သက်ပြီး ငါတစ်ခုခုခံစားမိတာရှိတယ်၊ အထူးသဖြင့် ဒုတိယဖြစ်ရပ်ကိုပေါ့။ နောက်ကွယ်မှာရှိနေတဲ့လူက ဒီလျှို့ဝှက်ကြံစည်မှုတွေကိုဖော်ထုတ်ဖို့ ငါတို့ကိုလမ်းပြခေါ်ဆောင်သွားပြီး တရားခံတပြုံတခေါင်းကြီးကို အမြစ်ကနေတူးထုတ်နိုင်ဖို့လုပ်ပေးလိုက်သလိုပဲ၊ အကယ်၍ ပူဆွေးယဇ်ပူဇော်ပွဲကသာ ရက်စက်ယုတ်မာပြီး လူသားမဆန်တဲ့လုပ်ရပ်မျိုးဖြစ်မနေခဲ့ဘူးဆိုရင် အဲဒီနောက်ကွယ်ကလူကို အများအကျိုးဆောင်တဲ့ အမှန်တရားဘက်တော်သားတစ်ယောက်လို့တောင် ငါ ထင်မိတော့မလို့ပဲ"
