ကလေးအလောင်းများသည်ရေတံတိုင်းတစ်လျှောက် စတင်၍ကုတ်တွယ်တက်လာကြသည်။ တစ်ချိန်တည်းမှာပင် မော်တော်ဘုတ်၏အောက်ခြေမှ ရေပူဖောင်းအမြောက်အမြားထွက်ပေါ်လာကြပြီး မော်တော်ဘုတ်မှာအပေါ်ဘက်သို့မြောက်တက်သွား၏__ မော်တော်ဘုတ်အောက်ခြေသို့ကူးခတ်လာကြသော ကလေးအလောင်းတစ်စုကြောင့် လှေဦးထိပ်မှာ လေထုထဲသို့မြောက်တက်သွားခြင်းဖြစ်လေသည်။
မော်တော်ဘုတ်မှာတစ်ဖက်သို့တိမ်းစောင်းသွားပြီး ရှာဖွေရေးဆလိုက်မီးများက ပိန်းပိတ်အောင်မည်းနက်နေသောရေပြင်ထက်ဝယ်ဖြတ်သန်းသွား၏။ ကလေးအလောင်းများမှာ မော်တော်ဘုတ်၏ဘေးအစွန်းနားသို့အပြည့်အဝတွယ်တက်လာကြပြီး သူတို့၏ပါးစပ်ပေါက်များကိုတစ်ညီတစ်ညာတည်းဖွင့်ဟကာ ကျိုးတိုးကျိုးတဲပေါက်နေသောသွားငယ်လေးများကိုလှစ်ဟပြသရင်း သံစုံတီးဝိုင်းတစ်ခုအလား တေးသီချင်းတစ်ပုဒ်ကိုတစ်ညီတစ်ညာတည်း အာပေါင်းအာရင်းသန်သန်ဖြင့်သံပြိုင်သီဆိုနေကြလေသည်။
ဝမ်ဇယ် : "ဒီကောင်စုတ်လေးတွေက ဘာတွေအော်ဆိုနေကြတာလဲ?"
" 'အသက်သွေးကြောဟာ မပြတ်တောက်သွားဘူး၊ လူသား-မိစ္ဆာဟာ မသေဆုံးဘူး'" ရွှမ်းကျီးက ဗလုံးဗထွေးရေရွတ်လိုက်သည်။
"ရှန့်...လူသားမျိုးနွယ်...ခင်ဗျားမှတ်မိသေးလား အဲဒီနှစ်တုန်းက ခင်ဗျား ကျွန်တော့်ကို ဘယ်နှပိုင်းလောက်ခုတ်ပိုင်းခဲ့သလဲဆိုတာကိုလေ"
"ခင်ဗျားက 'လူသေဘာသာစကား' မှာထူးချွန်တာကိုသိပါတယ်ဗျ"
ဝမ်ဇယ်က စိတ်မချမ်းမြေ့စွာပြောလာသည်။
"အကြမ်းဖျင်းသဘောလောက်ပဲရှင်းပြရင်ရပါပြီ၊ စကားလုံးတစ်လုံးချင်းစီအတိအကျဘာသာပြန်ပြစရာမလိုပါဘူးလို့!"
ဤသည်မှာ 'လူသေဘာသာစကား' မဟုတ်ပါချေ။ လွန်ခဲ့သောနှစ်ပေါင်းသုံးထောင်ခန့်က ရှေးခေတ်သုံး 'ယာ' ဘာသာစကားဖြစ်ပြီး ရွှမ်းကျီးမှာ ထိုစကားကိုရိပ်ဖမ်းသံဖမ်းလောက်သာနားလည်တာဖြစ်သည်။ သူ၏အရည်အချင်းအဆင့်အတန်းကိုသရုပ်ဖော်ပြရလျှင် *CET-4 တွင် ရမှတ် ၄၂၅ မှတ်ရရှိထားသူတစ်ယောက်က အမေရိကန်ရုပ်ရှင်ဇာတ်လမ်းတစ်ပုဒ်ကို စာတန်းထိုးမပါဘဲကြည့်နေရသူတစ်ဦးနှင့်တူသည်__တစ်ခါတရံနားလည်ပြီး တစ်ခါတရံနားမလည်ပါချေ။ စကားစပ်များကိုအရှေ့အနောက်ဆက်စပ်စဉ်းစားပြီး အကြောင်းအရာကိုရမ်းသန်းမှန်းသန်းဖြင့်မှန်းဆနေရသူတစ်ယောက်ပမာ။
(*CET 4 - College English Test Band 4)
