ထိုအချိန်၌ နတ်ဆရာမျိုးနွယ်စုဂူသင်္ချိုင်းမှာ ဘေးပတ်ဝန်းကျင်မှ လက်ဆွဲမီးအိမ်များ၏မီးအလင်းရောင်များကြောင့် ထိန်ထိန်ညီးထွန်းလင်းတောက်ပနေလျက်ရှိသည်။ တောင်ကြောတစ်လျှောက်မှာကား မစ်သရေးလ်ကျည်ဆန်များလက်ချက်ဖြင့် ထက်ပိုင်းပြတ်ကာပြိုကျပျက်စီးသွားကြပြီဖြစ်သလို လူများကိုလှည့်စားရန်အတွက်ပြုလုပ်ထားသော အတုအယောင်ပေါင်းမြက်သစ်ပင်များမှာလည်း မီးလောင်ကျွမ်းပြာကျလုမတတ်ဖြစ်သွားရှာလေသည်။ ယဇ်ပလ္လင်အတွင်းရှိရေအိုင်ငယ်လေးအတွင်းမှ တရှိန်ထိုးပန်းထွက်လာကြသော ရေများသည်ကား မြေနိမ့်ရာသို့အလုံးအရင်းဖြင့် စီးဆင်းသွားကြပြီးနောက် ပေါက်ကွဲမှုကြောင့်ဖြစ်ပေါ်လာခဲ့သော မြေကြီးပေါ်ရှိချိုင့်ခွက်များအတွင်းသို့စီးဝင်သွားကြကာ ယာယီ 'ရေအိုင်' ငယ်လေးများဖြစ်ပေါ်သွားကြလေတော့သည်။
နောက်ဆုံးတွင်တော့ အထူးတပ်ဖွဲ့များသည်ကား အထူးတပ်ဖွဲ့များဆိုသည့်အတိုင်းပင်ဖြစ်သည်။ ရှောင်းကျန်းက ထိပ်သီးတပ်ဖွဲ့တစ်ခုဖြစ်သော 'မိုးကြိုးမုန်တိုင်း' တပ်ဖွဲ့အတွင်းမှ ရေအမျိုးအစားထူးခြားစွမ်းရည်ပိုင်ရှင် ခြောက်ယောက်ကိုတိုက်ရိုက်စေလွှတ်ခဲ့လေသည်။ ထိုလူများမှာ ရဟတ်ယာဉ်သုံးစင်းခွဲလိုက်ကာ နတ်ဆရာဂူသင်္ချိုင်းအပေါ်မှဝိုင်းပတ်ပျံသန်းနေလျက် မြေကြီးထက်မှ ရေများကို 'ဆွဲယူ' လိုက်ကြလေသည်။ အဆိုပါရေများမှာ အဝတ်စတစ်လွှာကဲ့သို့နှယ် ကောင်းကင်ယံထက်ဆီသို့ 'ဆွဲယူ' ခြင်းခံလိုက်ရရှာသည်။
မြေပြင်ပေါ်တွင်ရှိနေသော ကွင်းဆင်းဝန်ထမ်းများမှာလည်း အုပ်စုပေါင်းများစွာခွဲလိုက်ပြီး 'ရေကန့်လန့်ကာ' ၏အနားနှစ်ဖက်တစ်လျှောက် စေ့စေ့စပ်စပ်ရှာဖွေစစ်ဆေးမှုများပြုလုပ်ကြလေတော့သည်။
ရှောင်းကျန်းက အလျင်အမြန်ပင် အနီးအနားရှိစီရင်စုများနှင့်မြို့ကြီးများတွင်ရှိနေသော ကွင်းဆင်းဝန်ထမ်းများကို ရသလောက်လိုက်လံစုဆောင်းလိုက်သည်။ ၎င်းတို့အနက်မှ တချို့တဝက်သည်ကား ယွဲ့သယ်ဘိုးဘိုး၏တပည့်သားမြေးများနောက်သို့လိုက်သွားကြပြီး တချို့တဝက်ကတော့ နတ်ဆရာဂူသင်္ချိုင်းအတွင်းကျန်နေရစ်ခဲ့ကြကာ ဒေသတစ်ခုလုံးကိုပိတ်ဆို့ထားလိုက်ကြသည်။ သုံးချွမ်းဒေသမှာ ဒေသခံပြည်သူများနှင့်ခရီးသွားဧည့်သည်အမြောက်အမြားရှိသောနေရာတစ်ခုဖြစ်သည့်အတွက် ၎င်းတို့သည်ကား ထိုဒေသအတွင်း ရှာဖွေမှုများကိုအလျင်အမြန်ဆောင်ရွက်ကာ နတ်ဆရာများ၏ အန္တရာယ်ရှိသောအကြွင်းအကျန်ပစ္စည်းများကို အမြန်ဆုံးရှင်းလင်းဖယ်ရှားပစ်ရမည်ဖြစ်သည်။ နောက်ပိုင်းတွင် ဤနေရာသို့လူများဝင်ရောက်လာပါက အန္တရာယ်တစ်စုံတစ်ရာကျန်ရစ်နေခဲ့ခြင်းမဖြစ်ရလေအောင် သေချာစွာရှင်းလင်းဆောင်ရွက်ထားရမည်ဖြစ်သည်။ အရေးကြီးဆုံးအရာကတော့ မြေငလျင်လှုပ်ခတ်ပြီးနောက် ရေအောက်ထဲသို့နစ်မြုပ်သွားသော ကြေးနီရောင်ခေါင်းတလားကို သူတို့အမြန်ဆုံးရှာတွေ့မှဖြစ်မည်။
