ရှန့်လင်ယွမ်းက စကားတစ်ခွန်းကိုလျင်မြန်စွာရွတ်ဆိုလိုက်သည်။ လှိုင်းတံပိုးများသည် သူ့စကားသံကိုတုံ့ပြန်သည့်အလား လူးလွန့်ထကြွလာပြီး ဧရာမလှိုင်းလုံးကြီးမှာ အသားစိုင်များကျန်ရှိနေသေးသောအလောင်းများနှင့် အသွေးအသားကင်းမဲ့နေပြီဖြစ်သောအလောင်းများအားလုံးကို အတူတကွရိုက်ပုတ်ချလိုက်လေသည်။ ပင်လယ်ရေပြင်ထဲတွင် လူဦးခေါင်းနှင့်ငါးခန္ဓာကိုယ်ရှိသောပုံရိပ်ယောင်တစ်ခုစုစည်းဖြစ်ပေါ်လာသည်။ လွန်ခဲ့သောနှစ်ထောင်ပေါင်းများစွာခန့်မှ ရေသူတစ်ယောက်၏ဒေါသမာန်ဟုန်ကြွနေသောအသက်ဝိညာဉ်သည်ကား သေရာမှအသက်ပြန်ဝင်လာသည့်နှယ်၊ ရေပြင်အတွင်းရှိ မိစ္ဆာအရိပ်သဏ္ဌာန်ကိုတစ်ချက်တည်းကိုက်ခဲပစ်လိုက်လေသည်။
ဝေးယွိက အော်ကြီးဟစ်ကျယ်ရယ်မောလိုက်၏။
"ရေသူဘာသာစကားပဲ၊ အံ့မခန်းထူးချွန်ပြောင်မြောင်လွန်းလှပါတဲ့ လူသားဧကရာဇ်ပါလား"
လူသားများအဖို့ကြားယောင်နိုင်သော၊ ထုတ်လွှတ်ပြောဆိုနိုင်သောအသံမှာ အလွန်တရာအကန့်အသတ်ရှိလှပေသည်။ ထူးခြားသောမျိုးဆက်များမဟုတ်ပါက တိုင်းတစ်ပါးမျိုးနွယ်စုတစ်စု၏ဘာသာစကားကို အမြဲတစေ အကြမ်းဖျင်းလောက်သာ တုပပြောဆိုနိုင်မည်ဖြစ်ကာ ရလဒ်မှာမူ ကံကြမ္မာ၏အဆုံးအဖြတ်ကိုသာကြည့်ရပေလိမ့်မည်။ ထိုလှည့်ကွက်မျိုးကို 'ပင်လယ်ရေအောက်ထဲတွင် လူပျောက်ရှာပုံတော်ဖွင့်ခြင်း' ကိစ္စတွင်သာ ရံဖန်ရံခါအသုံးပြုနိုင်မည်ဖြစ်ပြီး မည်သူကမှ ထိုအပေါ်တွင် သူတို့၏အသက်ကိုလောင်းကြေးထပ်ကြမည်မဟုတ်ပါချေ။ သို့သော် ဤကဲ့သို့ပြင်းထန်ကြမ်းတမ်းသောတိုက်ပွဲအချိန်အခါအတွင်း ရေသူဘာသာစကားကိုအသုံးပြုမည်ဆိုပါက မည်သို့သောရလဒ်မျိုးထွက်ပေါ်လာပါမည်နည်း။
အမြင်မတင့်တယ်သော ဥပမာတစ်ခုဖြင့်နှိုင်းယှဉ်ပြရပါမူ ၎င်းမှာ အခြေခံအားဖြင့် ရန်ဖြစ်သတ်ပုတ်ကြချိန်တွင် ခွေးတစ်ကောင်ကဲ့သို့ဟောင်နေသည့်အဖြစ်နှင့်ဆင်တူလှပေသည်။ ကြမ်းတမ်းခက်ထန်သောဟောင်သံမျိုးဖြင့် ရန်သူကိုကြောက်လန့်ထွက်ပြေးသွားစေရန်ကြိုးစားနေသကဲ့သို့ပင်။
