GTKWF (Myanmar Translation )

Chapter 44

{Unicode}

အပိုင်း ၄၄

ဟော့ရှီးက သူမအတွက် တတိယမြောက်ရှိုးပွဲလက်မှတ် ယူဆောင်လာပေးခြင်းဖြစ်သည်။

ရှန့်ချောင်မှာ ပျော်လွန်းလှသဖြင့်

"ငါ တော်တော်အရှက်မရှိတာပဲ"

ထိုစကားကိုဆိုရင်းပင် လက်မှတ်ကို အလျှင်အမြန်လှမ်းယူပြီးဖြစ်ကာ အရောင်ထွက်နေတဲ့ မျက်ဝန်းတို့ဖြင့် ဖင်တပြန်ခေါင်းတပြန် လှည့်ကြည့်သည်။

ပါးစပ်က ငြင်းနေပေမဲ့ ခန္ဓာကိုယ်က ရိုးသားသည်။

သူတို့ အိမ်ထဲဝင်လာချိန်တွင် အခန်းထဲ၌ ယောက်ျားလေးသုံး ရေမွေးနံ့မှာ ဝေ့ဝဲကျန်နေဆဲ။ ဟော့ရှီး မျက်မှောင်ကြုတ်လိုက်ပေမဲ့ ဘာမှ မမေးချေ။ ရှန့်ချောင် လက်မှတ်ကို သိမ်းလိုက်ကာ သူ့ထံပြေးလာသည်။

"ဟော့ရှီး နင် ဘာစားချင်လဲ? ငါ နင့်အတွက် ချက်ပေးမယ်"

"ဘာပဲဖြစ်ဖြစ်ရတယ်"

သူမ ဆံပင်ချည်လိုက်ကာ သူ့အတွက် တီဗီဖွင့်ပေးလိုက်ပြီး အတော်လေးကောင်းမွန်ပုံရသည့် မှတ်တမ်းရုပ်ရှင်ကို ဖွင့်လိုက်သည်။ ထို့နောက် ရေနွေးဖြင့် အသီးလက်ဖက်ရည်ကြမ်းတခွက် ဖျော်လိုက်ကာ အားလုံးပြီးဆုံးချိန်မှ မီးဖိုခန်းဆီ ပြေးဝင်သွားသည်။

မကြာခင်မှာပင် ကြော်လှော်သံကြားရသည်။ သူမကား စိတ်အခြေအနေကောင်းနေပုံရကာ ခပ်တိုးတိုး သီချင်းညည်းနေသည်။ ဂရုတစိုက်နားထောင်ကြည့်လျှင် သူ့သီချင်း။ တီဗီသံ၊ သီချင်းတိုးတိုးညည်းနေသံ ရောယှက်နေတဲ့ ဟင်းချက်သံက အခန်းတစ်ခုလုံး ပျံ့နှံ့လာကာ ပျောက်ဆုံးနေတဲ့ အနွေးဓါတ်ကို သူ့အား တောင့်တလာစေသည်။

ဟော့ရှီး မတ်တပ်ရပ်ကာ လမ်းထလျှောက်လိုက်ပြီး သူ့မျက်လုံးတွေက နံရံပေါ်ချိတ်ထားတဲ့ ပန်းချီတွေပေါ် အာရုံရောက်သွားသည်။

ယင်းမှာ တရုတ်ရိုးရာပန်းချီကားဖြစ်ပြီး တောင်တန်းအလယ်ရှိ ရေအိုင်ထက်မှ လရောင်ကို ရေးဆွဲထားခြင်းဖြစ်ကာ လက်မှတ်ထိုးထားသည်မှာ 'ရှန်ချင်းယွန်'။ ငယ်ရွယ်သူအချို့တလေသာ နံရံပေါ် တရုတ်ရိုးရာပန်းချီကားကို ချိတ်ဆွဲလေ့ရှိသည်။