GTKWF (Myanmar Translation )

Chapter 64.1

{Unicode}

အပိုင်း ၆၄.၁

အခြေအနေအရပ်ရပ်ကို တွက်ဆထားသည့်တိုင် နောက်ဆုံး အောင်နိုင်သူမှာ ရှန်ကျွင့်ယီး ဖြစ်မည်ဟု မမျှော်မှန်းထားခဲ့ပေ။

ပင်ပန်းမှုကြောင့် အချိန်စေ့သည်ထိ စောင့်ကာ ရေအမြုပ်ခံဖို့ စောင့်ဆိုင်းနေသည့် လော့ချင်းမှလွဲ၍ ကျန် လေးယောက်စလုံးမှာ သေနတ်ဖြင့် ပစ်သတ်ခံရသည်။ ရိုက်ကူးရေးပြီးဆုံးချိန်တွင် ဒါရိုက်တာအဖွဲ့က လှေတစ်စင်းလွှတ်ကာ ကျွန်းပေါ်ရှိ လူငါးယောက်ကို ပြန်ကြိုစေသည်။

ရှန့်ချောင် သေသွားမှန်း ကြားလိုက်ရချိန်တွင် လူတိုင်း အံ့အားသင့်သွားသည်။

ဖန်းကျီ - "သူက ကျားကို စားဖို့ ဝက် ဟန်ဆောင်နေတာ!! တမင်သက်သက် သေနတ်နဲ့ ပစ်တာပဲ ဖြစ်ရမယ်!"

သူ တမင်တကာ ပစ်သည်ဖြစ်စေ မတော်တဆဖြစ်သည်ဖြစ်စေ ရလဒ်ကား အတည်ပြုပြီးဖြစ်သည်။ ကျွန်းမှ ပြန်ရောက်ချိန်တွင် ကမ်းစပ်တွင် စောင့်ဆိုင်းနေသည့် ရှန်ကျွင့်ယီးက ခပ်မြန်မြန်ပြေးလာကာ ရှန့်ချောင်၏ လက်မောင်းကို ဆွဲရင်း ဆိုသည်။

"ရှုန်းတိ၊ မင်း ငါပြောတာ ယုံ၊ ငါ့မှာ ကျည်ဆန်ရှိသေးမှန်း ငါ တကယ်မသိဘူး!!"

ရှန့်ချောင် - "နင် သရဲဆိုရင် ငါ ယုံမယ်"

အခြားသူများသည်လည်း ရှန်ကျွင့်ယီးဆီ ပြေးလာကာ ဆူပူကြသည်။

ပင်ပန်းသည့်နေ့ရက်တစ်ရက် ကုန်လွန်သွားပြီးနောက် ပရိုဂရမ်အဖွဲ့က မနက်ဖြန်မနက် တရုတ်နိုင်ငံသို့ မပြန်မှီ သူတို့အားလုံး အနားယူနိုင်ရန်အတွက် ဟိုတယ်ဆီ ပို့ဆောင်ပေးသည်။ ရှန့်ချောင် ရေချိုးပြီးနောက် ကုတင်ပေါ်လဲလျောင်းနေရင်း တင်းကျန်ကို သူမခြေထောက်များအား အနည်းငယ်နှိပ်နယ်ပေးရန် ဆိုပြီး ဖုန်းဆော့သည်။

သူမအချိန်ဇယားများ စတင်ပြည့်ကျပ်လာချိန်မှစ၍ သူမဖန်ကလပ်အကောင့်များကို ကိုင်တွယ်ရန် ချာချာနှင့် ဖန်းပိုင်ထံ အပ်နှင်းထားသည်။ တရားဝင်အလုပ်ချိန်စာရင်းမှာ သူတို့နှစ်ယောက် ကြေငြာပေးခြင်းဖြစ်သော်လည်း မနက်ခင်းနှုတ်ခွန်းဆက်စကားကိုမူ သူမကိုယ်တိုင် ရေးဆဲဖြစ်သည်။ ထိုမျှသာမက သူမက မကြာခဏဆိုသလို ချောင်ဖန်များထံမှ မက်ဆေ့ချ်များကို ဖတ်လေ့ရှိပြီး အကြံပြုချက်များနှင့် တောင်းဆိုချက်များရှိမရှိ စစ်ဆေးလေ့ရှိသည်။