လွမ်းပျက်ပြယ်

အပိုင်း {၂၇} [ခ]

ညွှန်း အိပ်ရာနိုးလာတော့ အရာအားလုံးကပုံမှန်ဖြစ်နေသည်။ ညတုန်းက မမလွမ်းစကားတွေကြောင့် ပူလောင်ငိုကြွေးရတာနှင့် ဘယ်အချိန်အိပ်ပျော်သွားလဲမသိ။ မမလွမ်းဟာတော့ နိုးတော့ အနားမှာမရှိပဲ မနက်စာစားနေသည်။

"ချိုကိုပိုင်းလေး နိုးပြီလား။ ခဏ လွမ်း မနက်စာပြင်ပေး..."

စားနေရင်း ထရပ်ဖို့လုပ်သည့် မမလွမ်းကြောင့် မမလွမ်းရဲ့ ပခုံးလေးကိုမထရန်ဖိထားလိုက်သည်။

"ညွှန်း ဘာသာလုပ်လိုက်ပါ့မယ် မမလွမ်း စားပါ"

"ဟင့်အင်း လွမ်း..."

"မဟင့်အင်းဘူး မမလွမ်းရဲ့ ချိုကိုပိုင်းလေးက ဘာလဲဆိုတာမေ့နေပြီလား"

ညွှန်း လက်ကိုဖယ်ဖို့လုပ်ပြီး အတင်းပြင်ဆင်ပေးချင်နေတဲ့ မမလွမ်းကြောင့် သတိပေးလိုက်ရသည်။ ညွှန်းက စာဖိုမှူးဖြစ်တဲ့အပြင် Bakery ပိုင်းလည်းကိုယ့်ဘာသာလေ့လာနေတဲ့သူပါလေ။ တကယ်ဆို ညွှန်းကတောင် ပြန်လုပ်ပေးရမှာကို။

"အွန်ပါ လွမ်းကိုဖိမထားနဲ့တော့"

မမလွမ်း စကားကြောင့် ညွှန်းပြုံးလိုက်မိပြီး မမလွမ်း ပခုံးပေါ်မှလက်လေးကိုဖယ်ပေးလိုက်သည်။ မေမေ သူ့ဆီကို ဖုန်းဆက်မလာခင်ထိတော့ အရာအားလုံးကိုခေတ္တမေ့ထားပြီး မမလွမ်းနှင့်ပျော်အောင်နေမည်။

"ဒါနဲ့ အစ်မဟေသာရော"

ရေခဲသေတ္တာကို ဖွင့်ရင်းမေးလိုက်သည်။ ရေခဲသေတ္တာထဲတွင် ပေါင်မုန့်အပါဝင် စားစရာအတော်အများရှိနေသဖြင့် တစ်ယောက်ယောက်စျေးသွားထားပုံပင်။ ညွှန်း Butter Cake လေးကိုသာခွဲစားဖို့ထုတ်လိုက်သည်။

"ဟေသာက ခုနလေးတင် စျေးသွားပြီးပြန်လာတာ။ အသားငါးလည်း ဝယ်လာတာဆိုတော့ အခု ရေချိုးနေတယ်ထင်တယ်"

"ဒါဆို ငယ်ရော ပြန်ပြီလား"

"လေပြေငယ်က မနိုးသေးဘူးပြောတာပဲ"

ခရီးပန်းတာကိုနားလည်တဲ့အတွက် ညွှန်း ခေါင်းလေးတစ်ညိတ်ညိတ်လုပ်ရင်း လက်ထဲက Cake ကို နှစ်စိတ်လောက်ပိုင်းကာ ပန်းကန်ထဲထည့်လိုက်ပြီးမှ ရေခဲသေတ္တာထဲကျန်တာတွေကိုထည့်လိုက်သည်။ ဗိုက်ဆာနေပြီမို့ Coffee ကိုလည်း 3 In 1 အထုတ်ကိုသာ ဖျော်နိုင်တော့သည်။ ညွှန်း ပြင်တာဘယ်လောက်မှမကြာတာမို့ မမလွမ်းစားနေတာကလည်း မပြီးသေးပါ။