នៅហាងកាហ្វេ...
ដោយសារថ្ងៃនេះជាថ្ងៃសៅរ៍ហើយគ្មានបន្ទុកត្រូវទទួលវះកាត់អ្នកជំងឺទើបលោកដុកទ័រ Kang មានពេលចេញមកខាងក្រៅណាត់ជួប Suhee ម្តាយរបស់ Simon មកនិយាយរឿងថ្នាំដែលទើបនឹងផ្ញើមកពីបារាំងកាលពីព្រឹកមិញ ថាគួរចាប់ផ្តើមព្យាបាលនៅពេលណា ព្រោះកាន់តែឆាប់ក៏កាន់តែល្អសម្រាប់ Simon ដូចគ្នា។
« អង្គុយចុះមក ខ្ញុំកុម្ម៉ង់កាហ្វេឱ្យនាងរួចហើយ » លោកដុកទ័រងារដៃទៅពែងកាហ្វេដែលដាក់លើតុបរិវេណកៅអីទល់មុខ ទើបស្ត្រីវ័យកណ្តាលដែលមកដល់មុននេះរហ័សអង្គុយចុះតាមសម្តី។
« Hajoon លោកមកដល់យូរហើយមែនទេ? »
« មុននេះបន្តិច ខ្ញុំគ្មានម៉ោងវះកាត់ទើបឈៀងមកជួប »
« មានដំណឹងពីថ្នាំមែនទេ? » Suhee អង្គុយបំបាត់ភាពនឿយហត់ពីការធ្វើដំណើរ ហើយលើកពែងកាហ្វេមកក្រេបយឺតៗ។
« មែនហើយ ការពិសោធន៍ជោគជ័យ 100% ទើបនឹងបញ្ជូនមកដល់កាលពីព្រឹកមិញ »
« គេនឹងជា ត្រូវទេ? » នាងជាម្តាយបង្ហាញទឹកមុខភ័យព្រួយលាយឡំនឹងភាពតក់ក្រហល់ នាងរង់ចាំថ្ងៃនេះយូរមកហើយ ថ្នាំមួយនេះត្រូវធ្វើពិសោធន៍ជាច្រើនលើកច្រើនសារ ចំណាយពេលអស់ជាច្រើនឆ្នាំទម្រាំអាចចេញប្រើប្រាស់ជាផ្លូវការ ទីបំផុតកូនប្រុសតែមួយគត់របស់នាងមានសង្ឃឹមជាសះស្បើយហើយ។
« ប្រាកដណាស់ ស្ថានភាពរបស់គេត្រូវចាក់ថ្នាំរៀងរាល់ 2 សប្តាហ៍ម្តងសរុប 6ម្ជុល ព្រមទាំងលេបថ្នាំគ្រាប់ចំនួន 3 ខែ ខ្ញុំសន្យាហើយថានឹងព្យាបាលគេឱ្យជា »
« អរគុណ.. អរគុណខ្លាំងណាស់ » Suhee ញញឹមទាំងរលីងរលោងទឹកភ្នែកដោយភាពត្រេកអរ ធ្វើឱ្យកម្លោះចាស់ Hajoon ក៏អាចដកដង្ហើមដោយធូរចិត្តដែរ។
« កំឡុងពេលនេះ Simon បានធូរច្រើនណាស់ នាងចង់ចាប់ផ្តើមព្យាបាលនៅពេលណា? »
« ចាប់ផ្តើម- »
Ring..Ring...Ring..Ring-
ទូរស័ព្ទលោកដុកទ័ររោទ៍ឡើងកាត់សម្តី Suhee ទើបនាងផ្អាកនិយាយហើយធ្វើកាយវិការឱ្យលើកទូរស័ព្ទទទួលជាមុនព្រោះអ្នកដែលតេមកជាជំនួយការចំណិតនៅមន្ទីពេទ្យរបស់ Hajoon ។
« ហាឡូ! មានការអី? »
( ដុកទ័រ Kang! លោកនៅឯណា? ឆាប់ត្រឡប់មកមន្ទីពេទ្យឥឡូវនេះ ) សម្លេងរត់ដង្ហក់ដង្ហើមនិងសម្តីរញ៉េរញ៉ៃក្នុងមន្ទីពេទ្យលាន់លឺខ្ទរចេញពីទូរស័ព្ទធ្វើឱ្យ Hajoon ជ្រួញចិញ្ចើមឡើងដោយក្តីបារម្ភ។
« មានរឿងអី? ថ្ងៃនេះខ្ញុំគ្មានអ្នកជំងឺត្រូវវះកាត់ទេ »
( មិនមែនវះកាត់ទេ តែអ្នកជំងឺ 2 នាក់របស់លោកមានគ្រោះថ្នាក់ទើបនឹងបញ្ជូនមកដល់មន្ទីពេទ្យមុននេះ )
« នរណា? »
( Simon និង Munakata Kyosuke បញ្ជូនមកពីសាលាហួណាន )
« ខ្ញុំនឹងទៅឥឡូវនេះ! » លោកដុកទ័រចុចផ្តាច់ ដាក់ទូរស័ព្ទចូលក្នុងហោប៉ៅមុននឹងទាញអាវក្រៅក្រោករត់ចេញទៅក្រៅ។
« Suhee ទៅជាមួយខ្ញុំ! »
« មានរឿងអី? » ម្ចាស់ឈ្មោះឆក់យកកាបូបពីលើតុរត់ឡើងឡានជាមួយលោកដុកទ័រ។
« ខ្ញុំក៏មិនដឹងដែរ តែខាងសាលាបញ្ជូន Simon និង Kyosuke ទៅមន្ទីពេទ្យ »
« Simon Kyosuke... » ទ្រូងជាម្តាយស្ទើរប្រេះពេលលឺថាកូនប្រុសមានបញ្ហា នាងមានតែបន់ស្រន់ព្រះជាម្ចាស់សុំឱ្យជួយថែរក្សាពួកគេទាំងពីរឱ្យឆ្លងផុតស្ពានស្លាប់រស់លើកនេះ។
![](https://img.wattpad.com/cover/208343607-288-k622850.jpg)
YOU ARE READING
You're FAKE [Complete]
Romanceស្រឡាញ់អ្នក គឺជាកំហុសធំបំផុតក្នុងជីវិតខ្ញុំ " មនុស្សក្លែងក្លាយ!!! "