ဒုက္ခိတ အာဏာရှင်ကြီးနှင့် လျှပ်တစ်ပြက်လက်ထပ်ပြီး​နောက်

54.1

Unicode

တစ်လခွဲကြာသောအခါ—

ရှီယွင်နန်တစ်ယောက် လက်ထဲဖိတ်စာကိုင်ထားရင်း Mia Grand Hotel သို့ ရောက်ရှိလာခဲ့သည်။

ဧည့်ကြိုသမားကို ကားသော့ပေးလိုက်ပြီးနောက်၊ နောက်တစ်စက္ကန့်မှာပဲ သူ့ကိုစောင့်နေသည့် သူ့သူငယ်ချင်း ယွမ်ရွေ့ကို တွေ့လိုက်ရသည်။

"ယွမ်ရွေ့"

ရှီယွင်နန် ဟိုတယ်လော်ဘီထဲသို့ အမြန်ဝင်လိုက်၏။ ဆောင်းရာသီမို့ အပြင်မှာ အရမ်းအေးနေလေသည်။

ယွမ်ရွေ့သူ့ကို လက်ပြလိုက်ပြီးနောက်၊ လော်ဘီထဲရှိ နာရီအား ကြည့်လိုက်သည်။ "ပွဲစဖို့ အချိန်နည်းနည်းတော့ကျန်သေးတယ်။ ခဏလောက်ထိုင်နေကြမလား?"

"အိုကေလေ။"

သူတို့နှစ်ယောက် ဒီကိုရောက်လာရသည့် အကြောင်းရင်းမှာ ဖန်းယာနဲ့ သူ့ခင်ပွန်း၏ 25 နှစ်မြောက် မင်္ဂလာနှစ်ပတ်လည်အတွက် ဖိတ်စာရရှိခဲ့လို့ပင်။

အကျိုးတူပူးပေါင်းသည့် ပါတနာများအဖြစ်၊ ရှီယွင်နန်နဲ့ ယွမ်ရွေ့မှာ ရှေ့ဆင့်နောက်ဆင့် ရောက်လာကြ၏။

ထိုနေ့လေလံပွဲအပြီးတွင်၊ ဖန်းယာဦးဆောင်သော ဖန်းကုမ္ပဏီက သူတို့စတူဒီယိုနှင့် ပူးပေါင်းရန် ကမ်းလှမ်းလာခဲ့သည်။ ကမ်းလှမ်းချက်ကတော့ ရှင်းလင်းလေသည်-

နှစ်လပြည့်တိုင်း ယွမ်က ဖန်းမိသားစုလေလံပွဲမှာ ရောင်းချရန်၊ ကျောက်စိမ်းဒီဇိုင်းကို ဖန်တီးပေးရမည်ဖြစ်သည်။ နောက်ဆုံးအမြတ်ငွေကိုတော့ ချုပ်ဆိုထားတဲ့ စာချုပ်အတိုင်း ခွဲဝေရမည်ဖြစ်လေသည်။ ပူးပေါင်းဆောင်ရွက်သည့်ကာလကို အစမ်းသဘောအနေဖြင့် တစ်နှစ် သတ်မှတ်ထားကြသည်။

အကြမ်းဖျင်းဆွေးနွေးကြပြီးနောက်၊ ရှီယွင်နန်တို့က ပူးပေါင်းဆောင်ရွက်ဖို့ကို သဘောတူခဲ့ကြသည်။

ပထမအကြောင်းရင်းမှာ၊ ဖန်းမိသားစုအောက်ရှိ လေလံပွဲများတွင်၊  သူတို့ဒီဇိုင်းစတူဒီယိုကို ချဲ့ထွင်ရန်၊ ဖောက်သည်အများအပြားကို စုနိုင်မည်ဖြစ်ပြီး

ဒုတိယအကြောင်းရင်းမှာ၊ အသစ်ဖွင့်ထားသည့် ဒီဇိုင်းစတူဒီယိုအားလည်ပတ်ရန် ပုံမှန်ဝင်ရမည့် ဝင်ငွေမှာ မရှိမဖြစ်လိုအပ်တာကြောင့်ပင်။