حارستي الشخصية🗽مكتملة🗽

🗽الجزء 8🗽

🗽حــــارستـــــي الشخصـــــــي🌾

✍️بقلمــي:أميمـــــة بوكنشــــو

🩸الجــــــزء 8:

ضرب ليل وضوء القمر ولا مضوي في ديك السماء الخلابة،مخلياها النجوم يتيمة منها،كان واقف كيشوف في انعكاس القمر في المسبح كان كولشي نعس الا هو لي ماجاه نعاس،كانت أفكارو مشتتة وكيحاول يجمعهم مرة خرى بعد لي وقع معاه اليوم،اليوم كان شويا عاود ويموت...
تنهد بضيق وهو كيتفكر في ماضيه الأسود...صوت طفولتو كيداعب مسامعو بطريقة مخيفة «لا جدي مابغيتش نمشي بغيت نشوف واليديا،جدي لا لا مابغيتش خلوني معااكم،جديييييي»صرخة لي خلات قلبو يتهز ولا اراديا حط يدو عليه كتأكد بلي واش مزال ولا لا،حتى سمع صوتهم من لاور...

ضيا،زكرياء:غالي..

دار غالي شااف فيهم كان واحد هاز كيسان وتاني قرعة النبيذ...بتاسم وحرك يدو ومشاو جلسو وخدا ضياء كيكب في النبيذ...

ضياء:سمعت بلي وقع..."مد ليه الكاس" ماديرش في بالك...

غالي:"شرب وشاف فيه" غريب كفاش بابا كانو عندو هاد الاعداء كلهم...

زكرياء:غالي باباك راه...

غالي:"قاطعو"ماسوقيش،هديك كانت خدمتو ولا دا عليها ذنوب داها لراسو،انا مانبداش نحاسب في شخص ميت،اصلا تحرمت منو بسبابهم...ماكرهتش "بصوت حاقد" نعرف شكون من ورا موتتهم،غادي نقتلو بيديا...

ضياء:ةذن على هاد شي رجعتي؟

شاف فيه غالي وحرك راسو...

زكرياء:كتعرض حياتك للخطر اغالي...

غالي:اخر همي،20عام وانا صابر باش نعرف لي قتلو واليديا وختي و يتموني منهم...

ضياء:وسمعت حتى بديك البنت!!

غالي:"شرب وبتاسم" امممم..

ضياء:"بشك" عجباك؟

غالي:"شاف قدامو" هي ماكتخافش ومن فوق ماعندها حتى ذكرى بيا او بعائلتنا،هكاك كظن ماتأذينيش..

زكرياء:مرجلة لا؟بففف كفاش تبعت الشيفور صباح مهم انا خفت صراحة...

ضحكو عليه الدراري وهو يجبد تلفونو داخل لأنسطا...

غالي:ونتا؟

ضياء:مالي؟

غالي:خطوبة وداك شي اصاحبي...كي درتي ليها؟

ضياء:الزواج غيفيد شركتي...

غالي:ههه‍ه باز لك اولد عمتي،ليل ونهار لي في بالك هو الخدمة...

ضياء:هاهاها ضحكتيني اولد خالي...بحالا نتا كتقل عليا،بعدا "هز حاجبو بتسائل" ماتخدمش؟

غالي:مزال ماهدرت مع جدي ولكن ماكظنش،مامسليش...

زكرياء:لا مايمكنش.."شافو فيه" واواو بنت في ترند اشباب...

ضياء:أشمن بنت من البنات بسلامة؟

زكرياء:ماشي ديك الناحية كنهدر على بنت الحارستك شوف....

عطا تفون لغالي وقرب ضياء كيشوفو....كانت فاش وقفو ميراي دوك الرجال في الحي وفاش شدها وحاولو يخسرو وجهها كفاش ضربتهم حتى لحظة تاع فاش شيرت مول اكاميرا بصبعها...غالي وضياء مصدومين،ترسمت ابتسامة عريضة على تغر غالي برضى وشاف فيهم...

غالي:ماخطأتش الاختيار...

ضياء:"مزال مصدوم" لا ماخطأتيش حنا لي خطأنا...بنت غلبت 6دراري وخا تكون سبيدرمان...

زكرياء:قلت ليكم كتخلع...

غالي:نسا الخلعة،شوف لي يسمح الفديو...غنوض نعس عيت...تصبحو على خير...

_وأنت من أهلو...

مشا طلع وهو يخطف ضياء تلفون كيشوف في الفديو...

🔆اصبح واصبح الملك لله...

كانت ساعة 6ومنصف كيعلم كل واحد خدمتو وواقف على صحاب الصيانة يديرو أسلاك الكهربائة على الحيط...وكيف العادة كاع العائلة كتفيق مع هاد الوقت،لي كدير السبور يخرج يديرو في الجردة الخلفية لي فيها جميع الات السبور،او لي يدوش ويتقاد...الخدم معروف أنهم 4او 5كينودو يوجدو الفطور،7كيخص طابلة تكون واجدة على حقها وطريقها و7و30 كولشي كيكون جالس في الطابلة...
كانت كل العائلة جالسين في الطابلة وحتى غالي...

اما منصف كان برا كيخلص موالين صيانة حتى كانو خارجين وهو يلمحها داخلة مع البوابة...شير لبواب باش يخليها دخل حتى دخلت ووقفت قبالتو...

ميراي:امتى نبدا؟

منصف:من دبا...دخلي اولا عند سي النصيري باغي يهدر معاك...

هزت حاجبها وهي طلع قبالتو ودخلو لقصر...حتى وقفها ودخل عندهم لغرفة الأكل...

منصف:سي نصيري الانسة هنا...

كانو كملو الماكلة وكان يله يوقفو مشو الخدمة غير سمعو انسة كولشي جلس...حرك الجد يدو وهو يشوف منصف في ميراي حتى دخلت وخاشية يديها في جيوب سروال...دورت عينيها عليهم حتى ركزت على غالي لي منزل راسو كياكل ورجعت شافت في الجد بعد ماسمعت صوتو...

الجد:نتي هنا اذن...ياك كنتي كتقولي ماتقبليش تخدمي عندنا..

ميراي:مزال عند كلامي..

كولشي شاف فيها وهو يضرب الجد بعكازو في أرض...

الجد:شنو كتعني؟

ميراي:ماخداماش عندك هذا هو قصدي...

الجد:عندمن بسلامة؟

ميراي:حفيدك "شافت في غالي لي شاف فيها" ولا لا...

بتاسم غالي حتى شاف في جدو...

غالي:عندها حق اجدي...

الجد:وخا لالة،سيري مع منصف يعطك حويجك رسمية ومعلومات لي تحتاجي...

ميىاي:كتقول نبدل ستايل لبسي؟

طلعها وهبطها غالي وهو يشوف في جدو...

غالي:خليها هكا افضل بالنسبة ليا...

بتاسمت جنب بسخرية في وجه الجد وهو يحرك عينيه لمنصف لي شاف فيها باش تمشي قدامو،مشات خرجت وغالي ودراري متبعين ليها العين....

يتبع...