حارستي الشخصية🗽مكتملة🗽

🗽الجزء 163🗽

🗽حــــارستـــــي الشخصـــــــية🌾

✍️بقلمــي:أميمـــــة بوكنشــــو

🩸الجــــــزء163:

ضياء:علاش علاقاتنا معقدة هكا...علاش ولاد النصيري حياتهم معقدة..."شاف في غالي وضرب على ضهرو" نتا خاصك تصارح ميراي بالحقيقة..المراا مني كتحس بالخيانة كيكون صعيب تراضيها...

غالي:"تنهد" والله ماكرهت نخطفها ونهرب معاها لشي بلاصة بعيدة...نربو ولادنا براحتنا بلا مشاكيل ولا هُم يحزنون..."شاف فيهم" انا بصح كنبغي ميراي...انا ماندمان على والو في الماضي ديالي...حتاش كون كاعما وقع لي وقع ماكنتش تلاقا ميراي...كون ماتخلاتش عليا مارسلين وكون ماكذبش عليا جدي ودخل ايملي لحياتي يمكن ماكنتش نشوف ميراي...وانا فرحان بكاع لي مريت بيه لحد لأن لا من مشاكيل او صعوبات حتاش في الأخير ميراي في حياتي...ميراي ولات كولشي بالنسبة ليا وهي البنت الوحيدة لي باغي نكمل معاها حياتي ولكن خايف نخسرها...

زكرياء:حالتك ساهلة...لا صارحتي ميراي قبل ماتعرف من قنت أخر متأكد غتفهم الوضع...ميراي ماقديماش في عقليتها...وهي بنت ذكية تبارك الله وكبيرة ماشي برهوشة وكتفكر قبل ماتقرر او دير شي حاجة..

غالي:عارف...ميراي ذكية وعاقلة...كنظن بصح خاصني نهدر معاها باش نرتاح نفسيا من هاد الوضع...

ضرب ضياء على ضهرو وشاف قدامو...بقاو كلهم جالسين كيفكرو في حياتهم لي غادة وكتكفس...

🌐عند سيف...

نزل من أسونسير في السطح وشاف في هليكوبتر ومشا طلع وتحركت هليكوبتر بيه...بعد مدة كيوصل لواحد الجزيرة برات المغرب في الحدود وسط البحر مامعروفاش في الخريطة...نزل في سلم تاع هليكوبتر حتاش ماكاينش فين تحط ومشا غادي في الغاابة حتى وقف بين الأشجار وهو يورك على واحد الحجرة جنب حتى تحل الباب من تحت أرض رجع لاور حتى بانو دروج وهو يتم نازل..قاد قاميجتو ولبس لافيست ديالو فوق حتى كيبان لك مكتب ونااس غادين جيين...ماهدر ماتكلم نيشان لمكتب زجاجي دق فيه عاد دخل...شاف فيه ودار التحية رسمية..

..:رتاح...

سيف:حاضر "تقاد في الوقفة عادي" سي كرم أخيرا قبلتي تشوفني...

كرم:"رجل كبير في العمر ومداير نظارات" جلس...

جر سيف كرسي جلس وهو كيشوف فيه بلا خوف...

كرم:قال ليا عمر بلي باغي تاخد المكتب...

سيف:اه..

كرم:تزوجتي كما سمعت...

سيف:"عرف الخبار وصلت" اممم..

كرم:وخا اسي سيف قرار كيتكتب وغتاخد المكتب...ولكن تبقا تاخد المهمات من بعيد...اصلا كنفكرو لك في ترقية مادرتيش القليل خاصة بعد أخر مهمة لك...

سيف:شكرا..

كرم:دبا سير بقا ضيافة في غرفة التضاريب بما تكتب القرار...

حرك سيف راسو وناد وقف خرج...هز كرم تلفون كيهدر فيه..

🌐بعد يومين...

أوضاع مزال على حالها...زكرياء في المعرض مابقاش رجع لقصر ودارو كتوجد بعد مايكمل التنظيف...أما ضياء كيقادو ليه حتى هو في دار ومابقاش كينعس في نفس بيت ريم او كيهدر معاها...وبسباب ولادة أسية نساو موضوع العشا مع جدها...
أما ميراي ولات هدرتها قليلة مع غالي حتال انعدام وغالي مستغرب منها...
وبطبع أسية حابسة على راسها لا ماوكلوها بزز ماتاكلش...

دخل سيف لقصر كيهدر في التلفون...

سيف:را حطيت الوراق فوق مكتبك...

عمر:شنو مزربك فين مشيتي...

سيف:زربان وسلام عليكم...

قطع عليه وخشا تلفون في جيوبو ووقف قبالت بيتها وهو يحلو...دخل بخطوات سراع خفاف وهو كيشوف فيها ناعسة والبنت جنبها فايقة كدور في عينيها بصمت...قرب هزها وهو يبوسها وشم ريحتها الغزالة...شاف في أسية ناعسة وهو يحط البنت ومشا لدريسينغ جبد لافاليز كيجمع في الحويج...

🌐عند غالي...

كان واقف قدام المرايا كيلبس في الكومبلي..هز كرافاط كيشوف فيها ولف على ميراي تقادها ليه ولكن هي مابقاتش كتقرب حتى جيهتو مافهم والو فيها...دار شاف فيها ناعسة وتنهد...بغا غير الفرصة يعاود لها ماكيلقاش...وحتى مخاوفو مخلينو ساكت...حط الكرافاط وهز ورقة وستيلو كتب فيهم وقرب حطها فوق الكوافوز ومشا شاف في ملاك لي ناعسة وهدر بصوت شبه مسموع.....

غالي:اليوم غنعاود لماماك ونرتاح...انا متأكد غتفهم لي وقع...مانقدرش نتخيل حياتي بلا بيها تمناي ليا حظ موفق...

باسها ومشا خرج مخليهم ناعسين حتاش هو عندو اجتماع في مدينة خرى هكاك يمشي بكري باش يرحع دغيا...

يتبع...