Holymancer : Unang Aklat

Chapter 12, part 1 : Mark 'to kill' Liu

Sa apartment sa Bulacan tumuloy si Clyde matapos manggaling sa Makiling dungeon.

Pagkarating, natulog agad ang hunter. Pilit bumabawi ng lakas. Kailangan pa kasi n'yang pumasok sa isa pang dungeon sa araw ding 'yon. Kung hindi sa penalty zone na naman ang tuloy n'ya. At hindi 'yon gusto ni Clyde. Nagka-trauma yata s'ya sa huling beses na nanggaling s'ya ro'n.

Malinaw pa sa memorya ang matatalim na titig ng dilaw na mga mata ng mga taong lobo. Maging ang maliliksing kilos at matatalas na pakiramdam nila. Sa tuwing lalabas s'ya mula sa conceal state, hindi pumapalyang mahanap s'ya ng mga ito. Sa tuwing makikita s'ya ng mga taong lobo, inaatake nila s'ya gamit ang matatalim na kuko.

Matulin lang din namang bumangon si Clyde. Nakabusanggot na napahawak ang hunter sa ulo. Napaungol s'ya sa dahil naistorbo ang tulog.

Naalimpungatan kasi ito sa ingay ng mga bata sa kapitbahay. Mga bagong dating galing sa eskwela. Nagkakantahan ang mga bata.

"Nuestro Padre Jesus Nazareno,
Sinasamba Ka namin.
Pinipintuho Ka namin.
Aral Mo'y aming buhay at kaligtasan."

Napangiti na lang s'ya at napabuntong-hininga. Humupa ang namumuong inis sa pagkakaistorbo dahil sa kanilang kinakanta.

Pagtingin sa orasan sa pader, napagtanto n'yang kulang isang oras ang naging tulog n'ya. Muli, napabuntong-hininga s'ya. Nag-inat-inat s'ya bago lumabas ng kwarto.

Naghalungkat s'ya ng makakain sa ref. Wala pa kasi ang kapatid. Alas-sais ng gabi pa ang dating mula sa eskwelahan ni Gaea. Ngayon, mag-aalas-kwatro pa lang ng hapon.

Habang nilalamnan ang t'yan, malimit kung humigab si Clyde.

...

"Girl look at that body
I work out
Girl look at that body
I work out

When I walk on the spot,
This is what I see
Everybody stops and they staring at me
I got passion in my pants
and I ain't afraid to show it

Dj drop the beat! (Improvised)

I'm sexy and I knew it!"

Kanta't sayaw ni Clyde habang naliligo. Nakapikit at napapakagat-labi pa s'ya. Naiimagine nitong nasa isa s'yang dance floor at napapalibutan ng mga babae.

May nalalaman pa itong pagpapadausdos ng kamay mula sa tuktok ng mapandesal na tiyan pababa.

Si Clyde ay isang closet narcissist. Dagdag sa mahabang listahan ng wirdong personalidad ng hunter. Sa t'wing mag-isa ito at komportable sa bahay tulad ngayon, inaatake s'ya ng kasaltikan. Ang paborito n'yang lugar, ang CR. Doon, madalas s'yang mag-concert.

Nakatingala n'yang tinapat ang mukha sa malamig na tubig mula sa shower. Unti-unti nitong napawi ang pagkahapo mula sa raid at pagbyahe.

Sana naman mabawasan ang pagiging hot ko. Biro ni Clyde sa sarili.

Pinihit ni Clyde ang patayan ng shower nang makatapos ng s'yang maligo.

Nagtalsikan sa pader ang maraming butil ng tubig mula sa inalog-alog na buhok ni Clyde. Sunod, hinagod n'ya palikod ang kulot na buhok na natuwid ng pagkabasa.

Pinahiran ni Clyde ang malaki at nanlalabong salamin sa banyo. Tapos, minasdan n'yang mabuti ang sariling kahubdan sa salamin. Hindi n'ya mapigilang mapangiti sa nasilayan. Proud s'ya sa magandang katawan. Pinaghirapan n'ya 'yon. Sinundan 'yon ng pagfe-flex ng muscles.

Nang binago n'ya ang lifestyle sa high school, matinding hirap ang dinanas n'ya sa simula. Mahirap baliin ang nakasanayan. Kumonsulta s'ya sa doktor para sa guidance sa pagdyedyeta.